भारतबाट फर्किए रवि, सीमा समस्याबारे के भने ? 

राष्ट्रिय स्वतन्त्र पार्टीका सभापति रवि लामिछाने भारत भ्रमणबाट फर्केका छन् । स्वदेश फर्किएपछि शुक्रबार साँझ त्रिभुवन अन्तर्राष्ट्रिय विमानस्थलमा पत्रकारहरुसँग कुरा गर्दै उनले भारतसँग समृद्धिको विषयमा कुराकानी भएको बताए । 

सभापति लामिछानेले भने, ‘हामीले अगाडि बढ्न चाहेको क्षेत्र समृद्धिसँग जोडिएको क्षेत्र हो । खेलकुददेखि आईटीसम्मको वाइडर पिक्चरको कुराकानी गरेको छु ।’ 

आफूले भारतसँग कस्तो साझेदारी खोजेको भन्ने विषयमा प्रष्ट खाका राखेको पनि रविले खुलाए । विगतमा भएका राम्रो कुरालाई निरन्तरता दिने र कमजोरीको भारी नबोक्ने भन्दै भारतसँगको सम्बन्ध रिसेट भएको पनि टिप्पणी गरे । 

भारतीय प्रधानमन्त्री नरेन्द्र मोदी र अरु नेताहरुसँगको कुराकानी पारदर्शी रुपमा भएको र परराष्ट्र मन्त्रालयका प्रतिनिधिका रुपमा भारतका लागि नेपालका कार्यबाहक राजदूत सहभागी भएको पनि उनले बताए । 

पत्रकारले रविलाई आफू टेलिभिजन प्रस्तोता हुँदा भारतसँगको सीमा सम्बन्धी विषय जोडतोडले उठाएको सम्झाउँदै अहिले उठाउनुभयो कि उठाउनुभएन भन्दै प्रश्न गरेका थिए । 

जवाफमा रविले पत्रकार र एक्टिभिस्ट हुँदा उठाएको कुरा देशको ठूलो पार्टीको नेताका रुपमा उठाउन नमिल्ने जवाफ दिए । 

‘एक्टिभिस्टले उठाउने विषय, पत्रकारले उठाउने विषय र एउटा देशको सबैभन्दा धेरै जनाले पत्याएको राजनीतिक दलका रुपमा त्यसले उठाउने विषय । त्यसका फरक फरक जिम्मेवारी र फरक फरक संवेदनशीलता र जिम्मेवारी बुझ्न सकिएन भने कुटनीतिमा त्यसको महत्व हुँदैन’, उनले भने । 

लोकप्रियताका लागि कुरा उठाउन सजिलो भए पनि समस्या समाधान गर्न गाह्रो रहेको भन्दै रविले नेपालले सही ठाउँमा सही ढंगले आफ्ना कुरा राख्ने बताए । ‘ती कुरा कुटनीतिक माध्यमबाट अगाडि बढ्ने भएका हुनाले ती सडकका, सदनका वा मिडियाका चासो भन्दा माथि हुन्छन्’, रविले भने । 

प्रधानमन्त्री बालेन शाहले नेपालले पनि भारतको सीमा मिचेको छ भनेर दिएको अभिव्यक्तिमा परराष्ट्र मन्त्रालयले दिएको जवाफ नै आधिकारिक भएको बताए । 

अनि सरकार परिवर्तन हुन्छ भन्ने हल्ला के हो भनेर पत्रकारले सोधेको प्रश्नमा रविले भने, ‘निर्वाचन अगाडि हामीले लेखेको कागज पढ्न भन्न चाहन्छु । हामी अस्थिरताको पक्षमा होइन, स्थिरताको पक्षमा छौं ।’ 

चार दिने भारत भ्रमणका लागि रास्वपा सभापति रवि लामिछाने जेठ १८ गते नयाँदिल्ली प्रस्थान गरेका थिए । भारत भ्रमणका क्रममा उनले प्रधानमन्त्री नरेन्द्र मोदी, विदेशमन्त्री एस जयशंकर, भारतीय जनता पार्टीका अध्यक्ष नितिन नवीनलगायतसँग भेट गरेका थिए । उनले  भारतमा नेपाली समुदायसँग पनि भेटघाट र संवाद गरेका थिए ।

रविसँगै रास्वपा नेता तथा सांसदहरु विपिनकुमार आचार्य र दीपकराज बोहरा पनि भारत भ्रमणमा गएका थिए ।