वीरगञ्जका मेयरविरुद्ध भ्रष्टाचार मुद्दा

अख्तियार दुरुपयोग अनुसन्धान आयोगले वीरगञ्जका मेयर राजेशमान सिंहविरुद्ध भ्रष्टाचार मुद्दा दायर गरेको छ ।

गलत विवरण पेश गरी अरुको छोरीलाई आफ्नो छोरी बनाएर नागरिकता दिलाएको आरोपमा उनीविरुद्ध भ्रष्टाचार मुद्दा दायर गरेको हो । 

अख्तियारका प्रवक्ता सुरेश न्यौपानेका अनुसार यो प्रकरणमा वीरगञ्ज महानगरपालिका–३ का कार्यबाहक वडाअध्यक्ष तुफैल अख्तर ठकुराई र तत्कालिन वडा सचिव भिखारी रायविरुद्ध पनि भ्रष्टाचार मु्दा दायर गरिएको छ । 

गलत व्यहोराका आधारमा नागरिकता दिएको भेर जिल्ला प्रशासन कार्यालयका तत्कालिन शाखा अधिकृत षडकुमार पोखरेलविरुद्ध पनि भ्रष्टाचार मुद्दा दायर गरिएको छ । 

मेयर सिंहले आफ्नी छोरी भनेर नागरिकता सिफारिस गरेको घटनाको छानबिन गर्ने समितिका संयोजक गृह मन्त्रालयका तत्कालिन उपसचिव पुष्कर राना र शाखा अधिकृत परशुराम पोखरेलविरुद्ध पनि गलत प्रतिवेदन तयार पारेको भनेर भ्रष्टाचार मुुद्दा दायर गरिएको छ ।

भ्रष्टाचार मुद्दा दायर भएपछि मेयर सिंह निलम्बनमा परेका छन् ।