जर्मनीविरुद्ध इतिहास बनाउने कोमेनेन्सिया

विश्वकपमा पहिलो पटक पुगेको राष्ट्र, त्यसमाथि शक्तिशाली जर्मनीविरुद्ध पहिलो खेल । अनि पोस्टमा थिए विश्व फुटबलका चर्चित गोलकिपर म्यानुएल नोयर ।

यस्तो दबाबबीच जर्मनीविरुद्ध विश्वकपमा गोल गरेर चर्चामा आएका लिभानो कोमेनेन्सिया को हुन् ?

२२ वर्षीय कोमेनेन्सिया एक समय नेदरल्यान्ड्सका युवा टोलीका नियमित खेलाडी थिए । उनको जन्म सन् २००४ मा नेदरल्यान्ड्समै भएको हो । उनले सन् २०१२ मा आफ्नो प्रारम्भिक फुटबल प्रशिक्षण पीएसभीको एकेडेमीबाट सुरु गरे । 

त्यहाँ उनको करिब एक दशक वित्यो । उनी फुटबलमा यति प्रतिभाशाली थिए कि सन् २०२१ मा बेलायती पत्रिका द गार्डियनले उनलाई विश्वका उत्कृष्ट युवा फुटबल प्रतिभामध्ये एकका रूपमा सूचीकृत गरेको थियो ।

त्यसपछि उनको व्यवसायिक फुटबलको यात्रा इटालीको प्रतिष्ठित क्लब युभेन्टससम्म पुग्यो । त्यतिबेला धेरैले उनको भविष्य नेदरल्यान्ड्सको राष्ट्रिय टोलीसँग जोडेर हेरेका थिए । उनले नेदरल्यान्ड्स टिमबाट यू–१५ देखि यू–२० सम्मका खेलमा निकै उत्कृष्ट प्रदर्शनका साथ खेले । 

तर कोमेनेन्सियाले एउटा फरक निर्णय लिने विचार गरे । उनले आफ्नो पारिवारिक मुल थलो रहेको क्यारिबियन राष्ट्र क्युरसाओबाट प्रतिनिधित्व गर्न चाहे । २०२२ मा उनी क्युरसाओ टोलीमा आए ।

उनका अनुसार यो निर्णय लिन केही समय लागेको थियो । तर यही निर्णयले उनको करियरलाई नयाँ उचाइमा पुर्‍याएको छ ।

चार पटकको विश्व च्याम्पियन जर्मनीविरुद्ध गोल गर्दै कोमेनेन्सिया, क्युरसाओका लागि विश्वकप इतिहासमै गोल गर्ने पहिलो खेलाडी बनेका छन् । 

करिब डेढ लाख जनसंख्या रहेको क्युरसाओले २०११ मा मात्रै आफ्नै राष्ट्रिय टोली निर्माण गरेको हो । क्युरसाओले २०१४ बाटै फिफा विश्वकप छनोटमा प्रतिस्पर्धा गर्न थालेको थियो । 

हेर्नहोस् भिडियो :