एमबाप्पे बने फ्रान्सको सर्वाधिक गोलकर्ता

आजको दिन किलियन एम्बाप्पेका लागि विशेष रह्यो । 

उनी फ्रान्सका अहिलेसम्मका सबै स्टार फुटबलरलाई पछि पार्दै सर्वाधिक गोलकर्ता बन्न सफल भए । 

आज राति सेनेगलविरुद्धको खेलमा दुई गोल गरेपछि फ्रान्सका लागि उनले गरेको गोल संख्या ५८ पुगेको छ । 

यसअघि ५७ गोल गरेर ओलिभर जिरौड फ्रान्सका सर्वाधिक गोलकर्ता थिए । 

तर एम्बाप्पेले जम्मा २७ वर्षको उमेरमै देशका लागि ५८ गोल गरिसके । उनीसँग लामो करिअर बाँकी छ र अझै गोल संख्या बढाउन सक्छन् । 

एमबाप्पेले विश्वकपमा पनि आफ्नो गोल संख्या १४ पुर्‍याइसके । विश्वकपमा उनी भन्दा धेरै गोल गर्ने जम्मा ३ जना खेलाडी छन् । जर्मनीका मिरोस्लाभ क्लोस, अर्जेन्टिनाका लियोनेल मेसी र ब्राजिलका रोनाल्डो । 

मिरोस्लाभ क्लोस र मेसीले १६ गोल गरेका छन् भने रोनाल्डोले १५ गोल गरेका छन् । 

एमबाप्पे विश्वकपकै सर्वाधिक गोलकर्ता पनि बन्न सक्छन्, किनकी क्लोस र रोनाल्डोले फुटबल खेल्न छाडिसके भने मेसीका लागि पनि यो सम्भवत अन्तिम वर्ल्डकप हो । 

सन् २०१७ को मार्चमा फ्रान्सको राष्ट्रिय टिममा डेब्यु गरेका एमबाप्पे तेस्रो पटक विश्वकप खेलिरहेका छन् । 

सन् २०१८ मा रसिया विश्वकपमा पहिलो पटक खेलेका उनले क्रोएसियाविरुद्धको खेलमा पहिलो गोल गरेका थिए । त्यतिबेला उनी जम्मा १९ वर्षका थिए र ब्राजिलका पेले पछिका दोस्रो कान्छा गोलकर्ता बनेका थिए । 

पेलेले १७ वर्ष २४९ दिनमा विश्वकपमा गोल गर्दै कान्छा गोलकर्ताको नाम लेखाएका थिए । एमबाप्पे फ्रान्सका लागि भने विश्वकपमा कान्छा गोलकर्ता हुन् । उनले त्यो विश्वकपमा योङ प्लेयर अफ दि टुर्नामेन्टको उपाधि जितेका थिए । 

सन् २०२२ को विश्वकपमा एमबाप्पेले फाइनल खेलमै अर्जेन्टिनाविरुद्ध ह्याट्रिक गर्न सफल भए । तर पेनाल्टी सुटआउटमा भने फ्रान्स अर्जेन्टिनासँग पराजित हुन पुग्यो । 

यस वर्ष पनि फ्रान्स र एमबाप्पेले राम्रो सुरुवात गरेका छन्, विश्वकपको उपाधि नै जित्छ कि जित्दैन, त्यो त बाँकी खेलहरुले बताउनेछ । 

हेर्नुहोस् भिडियो