ह्याट्रिकसँगै मेसीले बनाए नयाँ रेकर्ड

लियोनेल मेसीले आफ्नो करिअरमा फेरि अर्को पनि रेकर्ड बनाएका छन् । 

आज बिहान अल्जेरियाविरुद्धको खेलमा ह्याट्रिक पूरा गर्दै उनले विश्वकपमा धेरै गोल गर्ने खेलाडीमा आफ्नो नाम लेखाए ।

विश्वकपमा १६ गोल गरेर जर्मनीका मिरोस्लाभ क्लोस धेरै गोल गर्ने खेलाडीको रेकर्ड बनाएका थिए । तर आज मेसीले ह्याट्रिक पूरा गर्दै क्लोससँगको रेकर्ड बराबरी गरे ।

३८ वर्षका मेसीले आज अर्जेन्टिनाबाट आफ्नो २०० औं खेल खेलेका थिए । सन् २००५ मा १८ वर्षको उमेरदेखि राष्ट्रिय टिमबाट खेल्न थालेका मेसीले पहिलो विश्वकप भने २००६ मा खेलेका थिए ।

अहिले उनी छैटौं पटक विश्वकप खेल्दैछन् । उनले विश्वकपमा अहिलेसम्म २७ खेल खेलिसकेका छन् र ५ वटा विश्वकपमा गोल गर्ने खेलाडीका रुपमा पनि आफ्नो नाम लेखाएका छन् । 

मेसीको फुटबल करिअर रेकर्ड नै रेकर्डले भरिएको छ । राष्ट्रिय टिमबाट मात्र होइन, क्लब फुटबलमा पनि उनले धेरै उपाधि जित्नुका साथै व्यक्तिगत रेकर्ड बनाएका छन् । 

मेसीले विश्वकपमा पहिलो गोल गरेको दिन र ह्याट्रिक गरेको दिन पनि एउटै परेको छ । सन् २००६ को विश्वकपमा उनले आजकै दिनमा सर्बिया एण्ड मन्टेनेग्रोविरुद्ध पहिलो गोल गरेका थिए । 

उनले सन् २०२२ मा विश्वकपको उपाधि जिते, सन् २०१८ को वल्र्डकपमा उपविजेत बने । विश्वकपमा गोल्डेन बल पनि पाइसके । दुई पटक कोपा अमेरिकाको उपाधि जिते । अर्जेन्टिनाका लागि ११९ अन्तर्राष्ट्रिय गोल गरिसकेका छन् । 

मेसीको सिंगो फुटबल करिअरको कुरा गर्ने हो भने उनले कुल ९१३ गोल गरेका छन् । र विभिन्न ४८ वटा उपाधि जितेका छन् । त्यसमा ८ ओटा बालन डिओर विशेष छन् । 

हेर्नुहोस् भिडियो