सर्लाहीबाट ७५ बोरा फर्सीको बियाँ बरामद

बिहीबार दिउँसो सर्लाहीबाट ७५ बोरा फर्सीको बियाँ बरामद भएको छ । मलंगवा नगरपालिका–२ कृष्णमन्दिरस्थित दिनकर सेल्स सप्लायर्समा अवैध रुपमा भण्डारण गरेर राखेको फर्सीको बियाँ बरामद गरेको सशस्त्र प्रहरी बलका प्रवक्ता डीआईजी नेत्रबहादुर कार्कीले जानकारी दिए ।

सशस्त्र प्रहरी बल, नेपाल नं. १० सर्लाहीको टोलीले बुधबार साँझ नवीनकुमार यादवको उक्त सप्लायर्समा छापा हानेको थियो ।  त्यसपछि बिहीबार दिउँसो सशस्त्र प्रहरी, नेपाल प्रहरी र जिल्ला प्रशासन कार्यालयको टोलीले फर्सीको बियाँ बरामद गरेको हो ।

उक्त सप्लायर्स फर्सीको बियाँ बरामद गर्ने क्रममा केही स्थानीयले ढुंगामुढा पनि गरेका थिए । त्यसपछि सशस्त्र प्रहरीले एउटा ग्यास सेल फायर गरेको थियो । स्थानीयको ढुंगामुढाबाट सशस्त्र प्रहरी बलको गाडीको सीसा फुटेको  छ ।

बरामद गरेको फर्सीका बियाँ सर्लाही भन्सार कार्यालयमा बुझाएको डीआईजी कार्कीले जानकारी दिए ।