मेसीको बुबलाई के भएको हो ?, परिवारले निकाल्यो विज्ञप्ति

लियोनेल मेसी वर्ल्ड कप खेल्न अहिले अमेरिकामा छन् । तर उनका बुबा बिरामी छन् । उनका बुबा जर्ज मेसी अहिले पहिचान हुन नसकेको स्वास्थ्य समस्याको उपचार गराइरहेका छन् । 

मेसीको मिडिया अफिसले एक विज्ञप्ति जारी गर्दै भनेको छ, ‘जर्ज मेसीलाई सञ्चो छैन, उहाँ अहिले चिकित्सकको निगरानीमा हुनुहुन्छ र उहाँको अवस्थामा सकारात्मक प्रगति देखिइरहेको छ ।’

अर्जेन्टिनाको एक टेलिभिजनले मेसीका बुबाको निधन भएको झुटो खबर दिएको थियो । उक्त झुटो खबर दिने टेलिभिजन एंकरले माफी माग्दै राजीनामा दिइसकेकी छन् । 

मेसी परिवारले विज्ञप्तिमा यस्तो समयमा जिम्मेवार, विवेकी र मानवीय भावना राख्न अनुरोध गरेको छ । ‘कुनै पनि व्यक्तिको स्वास्थ्य र उनीहरुको परिवारको मनोभावना कसैको अनुमान र गैरजिम्मेवार मिडियाको चासो बन्नु हुँदैन’, विज्ञप्तिमा भनिएको छ । 

असार ५ गते अल्जेरियाविरुद्धको खेलमा मेसीले ह्याट्रिक पूरा गरेर कुल १६ गोलसहित विश्वकपका सर्वाधिक गोलकर्ता नै बने । तर त्यो खेलमा पहिलो गोलपछि मेसी भावुक बनेका थिए । 

खेलपछि उनले आफू फुटबल भन्दा अन्य कारणले नै भावुक बनेको प्रतिक्रिया दिएका थिए । ‘म किन रोएँ भने, अहिले मेरा दिनहरु धेरै अप्ठेरा छन्, तर यो फुटबलसँग सम्बन्धित छैन’,उनले भनेका थिए । 

लियोनेल मेसी जर्ज मेसीका कान्छा छोरा हुन् । मेसीको करिअरमा उनका बुबाको धेरै ठूलो भूमिका छ । जर्ज मेसीले लियोनेल मेसीको एजेन्टका रुपमा काम गर्नुका साथै उनको व्यवसायिक मामिला सम्हालेका छन् । 

उनले नै सानो हुँदा लियोनेल मेसीलाई बार्सिलोनामा प्रशिक्षण र उपचारका लागि लगेका थिए । बार्सिलोना, पेरिस सेन्ट जर्मेन र इन्टर मियामी क्लबसँगको कन्ट्रयाक्टका लागि सहजीकरण पनि जर्ज मेसीले नै गरेका थिए । 

लियोनेल मेसीको लगानी रहेका क्षेत्रहरु रियलस्टेट, होटल र रेष्टुरेन्टको कारोबार पनि उनले नै सम्हाल्दै आएका छन् ।