नेपालले खेल्नेछ स्ट्रिट फुटबलको विश्वकप, छनोट खेल हुँदैछ काठमाडौंमा

नेपालले पनि फुटबलको विश्वकप खेल्दै छ नि थाहा छ ? तर अहिले चलिरहेको जस्तो फिफा वर्ल्डकप होइन, स्ट्रिट फुटबलको हो । तीन जनाले खेल्ने थ्री भी थ्री स्ट्रिट फुटबलको विश्वकप हुँदैछ आगामी सेप्टेम्बरमा नेदरल्याण्डसमा । 

थ्री भी थ्री स्ट्रिट फुटबल फुटबलको कान्छो संस्करण हो । तीव्र गति, उच्च कौशल र चामत्कारिक कलाका लागि प्रसिद्ध छ । 

यो फुटबल प्रतियोगिता कुनै ठूलो ग्राउण्डमा होइन, शहरका साँघुरा गल्लीहरुमा खेलाइन्छ । 

नामबाटै थाहा हुन्छ थ्री भी थ्री फु्टबलमा ३–३ जना खेलाडी हुन्छन् । 

यसको अर्को विशेषता के हो भने गोलकिपर हुँदैन, खेलाडीले हातले बल समात्न पाउँदैनन् । 

१५ मिटर लम्बाइ र १० मिटर चौडाइ भएको ग्राउण्डमा खेलाइन्छ । 

गोल पोस्टको आकार पनि निकै सानो हुन्छ– ५ फिट लामो र ३ फिट अग्लो । 

प्रत्येक खेल ब्रेक बिना लगातार १० मिनेटको हुनेछ । 

यही असार १७ देखि काठमाडौंमा थ्री भी थ्री स्ट्रिट फुटबलको वर्ल्ड कप क्वालिफायर्स खेल हुने छ ।

टेकुको कुमा ननी, तबाहाल, लगन, ओमबहाल र तेबहाल संकटा गरी ५ वटा गल्लीमा खेल हुनेछ । खेलहरु अपरान्ह ३ बजेदेखि ८ बजेसम्म हुनेछ । साँझका खेलहरु अन्डर लाइटमा खेलाइनेछ । 

क्वालिफायर्समा ९२ टोलीले भाग लिने छन्, जसलाई २३ समूहमा विभाजन गरिएको छ । 

प्रत्येक समूहको विजेता र उपविजेता अनि तेस्रो स्थानमा उत्कृष्ट रहेका १८ टोली गरी कुल ६४ टोलीबीच नकआउट खेलाइनेछ । 

समूह चरणका खेल जुलाइ १ देखि ८ तारेखसम्म हुनेछन् । जुलाई १० र ११ मा राउन्ड अफ ६४ का खेलहरु हुनेछन् । 

जुलाइ १३ गते राउन्ड अफ ३२ का खेल हुनेछन् । जुलाई १५ मा राउन्ड अफ १६ का खेल हुनेछन् । जुलाइ १९ मा क्वार्टरफाइनल, सेमिफाइनल, तेस्रो स्थान र फाइनल खेल हुनेछ । 

र, यो प्रतियोगिताको विजेताले आगामी सेप्टेम्बर २ देखि ६ तारेखसम्म नेदरल्याण्डसको युट्रेक्टमा हुने आईएसएफए थ्री भी थ्री स्ट्रिट फुटबल वर्ल्ड कप २०२६ मा नेपालको प्रतिनिधित्व गर्नेछ । 

यो सबै बन्दोबस्त मिलाएको छ, एलपीएस म्यानेजमेन्ट प्रालिले । एलपीएस म्यानेजमेन्ट प्रालिका सीईओ विकल्प खरेलका अनुसार विजेता टोलीका खेलाडीसँग एलपीएस म्यानेजमेन्टले ३ महिनाको खेलाडी सम्झौता पनि गर्नेछ । 

विश्वकपको विशेष तयारीका लागि क्लोज क्याम्पमा पनि राख्नेछ । 

हेर्नुहोस् भिडियो :