ठमेलमा यौन व्यवसाय गर्न आउँछन् युगाण्डाका महिला

काठमाडौंको ठमेलमा यौन व्यवसाय गर्न युगाण्डादेखि महिलाहरु आउने गरेको पाइएको छ । 

ठमेलको चोक चोकमा उनीहरुले पर्यटकसँग बार्गेनिङ गरेको दृश्य धेरैको आँखा बिझाएको छ । 

प्रहरीले बेला बेलामा पक्राउ गरेर उनीहरुलाई डिपोर्ट गर्दै आएको पनि छ । तर यो सिलसिला रोकिएको छैन । 

गत चैत जिल्ला प्रहरी परिसर काठमाडौंले ठमेलका विभिन्न चोकबाट युगाण्डाका २० जना महिलालाई पक्राउ गरेको थियो । उनीहरुले विदेशी र स्वदेशी पर्यटक अनि सर्वसाधारण पुरुषलाई बाटो छेकेर अश्लिल क्रियाकलापका लागि मोलमोलाइ गर्ने, हैरानी दिने काम गर्थे ।

प्रहरीले सम्झाइ बुझाइ गर्न खोज्दा प्रहरीलाई नै गाली गर्ने र धक्कामुक्का गर्ने गर्थे । प्रहरीले पक्राउ गरेर उनीहरुलाई १ वर्षसम्म नेपाल आउन नपाउने गरी डिपोर्ट गरेको थियो । 

असार २० गते फेरि युगाण्डाकै ३ जना महिला ठमेलबाटै पक्राउ परेका छन् । 

जिल्ला प्रहरी परिसर काठमाडौंका प्रहरी उपरीक्षक पवनकुमार भट्टराईका अनुसार युगाण्डाका महिलाहरु यौन व्यवसाय गरेर पैसा कमाउने उद्देश्यले नै नेपाल आउने गरेको पाइएको छ । 

युगाण्डा नेपाल भन्दा गरिब देश हो । उनीहरु ४५ दिन बस्न मिल्ने टुरिस्ट भिसामा नेपाल आउने गरेका छन् । नेपाल एउटा टुरिष्ट डेस्टिनेसन बन्दै गएको थाहा पाएर उनीहरु यौन व्यवसायको सम्भावना देखेर आएको पाइएको प्रहरीको भनाइ छ ।