‘फनेरल अफ दी सेन्चुरी’

इरानमा आज पूर्व सर्वोच्च नेता आयोतुल्लाह अलि खामेनीको शवयात्रा थियो । 

राजधानी तेहरानमा आज हजारौं इरानीहरु खामेनीको शवयात्रामा सहभागी भए । 

खामेनी गत फेब्रुअरी २८ मा अमेरिका र इरानको हवाइ आक्रमणमा मारिएका थिए । त्यसपछि ४ महिनासम्म इरानले अमेरिका र इजरायलसँग निरन्तर युद्ध गर्‍यो । अहिले युद्धबिरामका बेला इरानले खामेनीको अन्तिम संस्कार आयोजना गरेको हो । 

अन्तिम संस्कार अन्तर्गत आज इरानको तेहरानमा शवयात्रा गरिएको छ । शवयात्राको दिन इरानमा सरकारी र निजी कार्यालय, यातायात र बजार सबै बन्द छ । 

खामेनीसँगै उनकी छोरी, ३ वर्षकी नातिनी, ज्वाइँ र बुहारीको शव राखिएका गाडी शहरमा विस्तारै गुडाइएको छ । चर्को गर्मीको परवाह नगरी सर्वसाधारण शवयात्रामा सहभागी  भएका छन् । शव यात्रामा सहभागीहरुलाई शीतल बनाउन शहरबासीले पानी छेपेका छन् । 

खामेनीले इरानमा ३५ वर्षसम्म शासन गरे । अमेरिका र इजरायलको आक्रमणमा गत फेब्रुअरीमा उनी मारिएपछि उनको छोरा मोजताबा अलि खामेनी सर्वोच्च नेता चयन भएका छन् । तर उनी शवयात्रा लगायत अन्तिम संस्कारका कुनै पनि कार्यक्रममा देखा परेका छैनन् । 

खामेनीको अन्तिम संस्कारको कार्यक्रम गत शुक्रबार अर्थात् ३ जुलाइमा सुरु भएको थियो । त्यस दिन अन्तर्राष्ट्रिय विशिष्ट अतिथिहरुलाई पनि श्रद्धाञ्जली समारोहमा बोलाइएको थियो । 

त्यसपछिको दुई दिन तेहरानको ग्रान्ड मोसाला मस्जिदमा शोक सभा गरिएको थियो । 

आज बिहानदेखि तेहरानमा शवयात्रा गरिएको छ । यो शवयात्रा १० देखि १२ घण्टाको हुनेछ । 

यसपछि भोलि खामेनीको शव इराकको कोम शहरमा लगिनेछ । पर्सि इराककै नाजाफ र कारबालामा लगिनेछ । यी शहर मक्का र मदिनापछि सिया मुस्लिमहरुको पवित्र तीर्थस्थल मानिन्छ । 

९ जुलाइमा इरानको उत्तर पूर्वी शहर मसादमा खामेनीको अन्त्येष्टि गरिनेछ ।

इरानले आफ्नो सर्वोच्च नेताको अन्त्येष्टिलाई आफ्नो राष्ट्रिय एकता र शक्ति प्रदर्शनको अवसर बनाएको छ । 

इरानी अधिकारीहरुले खामेनीको अन्तिम संस्कारलाई फनेरल अफ दी सेन्चुरी पनि भनेका छन् ।

हेर्नुहोस् भिडियो :