रुँदै रुँदै बिदा भए नेयमार 

जब रेफ्रीले फाइनल ह्वीसल बजाए, नेयमार मैदानमा थचक्क बसे, दुबै हातले टाउको समाए अनि धरधरि रोए । 

उता ब्राजिलमाथि २–१ को विजयसँगै क्वार्टरफाइनल पुगेपछि नर्वेका खेलाडीहरु खुशी बनाइरहेका थिए । अर्लिङ हालान्ड मैदानमै ड्रम ल्याएर बजाइरहेका थिए । 

यो नेयमारको अन्तिम विश्वकप हो, अझ ब्राजिल टिमबाट पनि उनले अब नखेल्न सक्छन्, उनले पोस्ट म्याच कन्फ्रेन्समा सिधै त भनेनन्, तर सन्यासको संकेत गरेका छन् । 

अन्तिम विश्वकप उनले यादगार बनाउन सकेनन् । लगातारको चोटका कारण सन् २०२३ देखि नै नेयमारले राष्ट्रिय टिममा पर्न संघर्ष गरिरहेका थिए । विश्वकपको टिम बनाउँदा प्रशिक्षक कार्लो एन्सेलोट्टीले नेयमारलाई बोलाउन त बोलाए, तर मैदान उतार्ने रिस्क लिन चाहेनन् । 

यो विश्वकपमा नेयमारले जम्मा ३८ मिनेट मात्र खेल्न पाए । ब्राजिलले ५ खेल खेलेकामा नेयमारले दुई खेल मात्र खेल्न पाए । समूह चरणमा स्कटल्याण्डविरुद्ध उनले १५ मिनेट र राउन्ड अफ १६ मा नर्वेविरुद्ध २३ मिनेट । नर्वेविरुद्ध अन्तिम मिनेटमा पेनाल्टीमा गोल गर्दै गोल गर्ने खेलाडीमा नाम पनि लेखाए । 

नेयमार विश्व फुटबलका एक प्रतिभाशाली खेलाडी हुन् । उनले ब्राजिलका लागि १३० खेल खेल्दा ८० गोल गरे । ७७ गोल गरेका पेलेलाई उछिन्दै सर्वाधिक गोलकर्ता बने । 

तर, उनको समयमा ब्राजिलले अन्तर्राष्ट्रिय फुटबलमा राम्रो पर्फमेन्स गर्न सकेन । नेयमारको बेस्ट पर्फमेन्स भनेको सन् २०१४ को विश्वकपमा सेमिफाइनलमा पुग्नु नै रह्यो । 

नेयमारले सन् २०१० देखि ब्राजिल टिमबाट खेल्न थालेका हुन् । एक समय नेयमार विश्व फुटबलकै ठूला स्टार थिए । लियोनेल मेस्सी र क्रिष्टियानो रोनाल्डोपछि नेयमारको युग सुरु हुने धेरैको अनुमान थियो । 

सन् २०१३ मा स्पेनी क्लब बार्सिलोना गएदेखि उनको करिअरको ग्राफ उकालो लागेको थियो । त्यहाँ उनले लियोनेल मेसी र उरुग्वेका लुइस स्वारेजसँग जोडी बाँध्न पाए । त्यतिबेला यो ट्रिओलाई एमएसएन भनिन्थ्यो ।  धेरैवटा ला लिगा टाइटल जिते, च्याम्पियन्स लिगको टाइटल पनि जिते । 

सन् २०१७ मा बार्सिलोना छाडेपछि भने उनको करिअर विस्तारै छाँयामा पर्न थाल्यो । उनी सन् २०१७ मा कीर्तिमानी मूल्य २१७ मिलियन डलरमा बार्सिलोनाबाट फ्रान्सेली क्लब पेरिस सेन्ट जर्मेन पीएसजीमा आवद्ध भए । तर इन्जुरीका कारण उनले पीएसजीमा राम्रो छाप छाड्न सकेनन् । 

सन् २०२३ मा उनी साउदी अरेबियाको अल हिलाल क्लबमा ज्वाइन भए तर दुई वर्षपछि आफ्नै देश ब्राजिलको सान्तोषमा फर्किएर फुटबल खेलिरहेका थिए । 

तर, यी स्टारले विश्पकप मात्रै हैन, आफ्नो करियरमा कोपा अमेरिकाको उपाधि पनि जित्न सकेका छैनन् । यस्ता स्टारले चोटका कारण सधैं आफ्नो इन्टरनेसनल फुटबल करियरमा संघर्ष मात्रै सामना गर्नुपर्‍यो । यसपटकको विश्पकपमा उनी खाली हात ब्रजिल फर्किएका छन् । 

हेर्नुहोस् भिडियो