विश्वकपमा यामालको भाइको चर्चा 

विश्वकप जितेपछि स्पेनी खेलाडीहरु स्टेडियममा खुशी मनाइरहेका थिए । 

एउटा सानो बच्चा गोल पोस्टमा चुँडिएको नेटको एक टुक्रा टिपेर दौडिदै यामाललाई भेट्न पुग्छन् । र त्यो नेट दिन्छन् । 

यामाल त्यो नेटलाई भुइँमा फालेर बच्चालाई काखमा लिन्छन् र म्वाइँ खान्छन् । 

ती साना बालकले पनि यमालकै १९ नम्बरको जर्सी लगाएका छन् । 

स्पेनका हरेकजसो खेलमा देखिने यी बालक को हुन् भन्ने धेरैले चिनिसके । किनकी उनको अनुहार हेरेरै थाहा हुन्छ, यिनी यामालकै भाइ हुन्, उनी ४ वर्षका केन । 

अर्जेन्टिनालाई फाइनलमा १–० ले हराएपछि स्पेनी टिम खुशी मनाइरहेका बेला यामालका भाइ केन पनि मैदानमै पुगेका थिए । उनको सेलिब्रेसन धेरैका लागि रोचक थियो । 

उनी कहिले यामालको क्याप लगाउँथे, कहिले वल्र्ड कप ट्रफी हातमा लिएर रमाउँथे, कहिले फुटबल खेल्थे त कहिले मैदानमा ड्युटीमा रहेका पुलिस अफिसरको क्याप लगाउँथे । 

केनले यो विश्वकपमा दाजु यामालले खेलेका धेरै खेल मैदानमै गएर हेरेका छन् । उनले खुशी मनाएको फोटो र भिडियो सामाजिक सञ्जालमा भाइरल भइरहेका छन् । 

केनलाई धेरैले नोटिस गरेको राउन्ड ३२ मा स्पेन र अष्ट्रियाविरुद्धको खेलपछि हो । 

एक जना स्पेनी समर्थकले एक्समा भिडियो पोस्ट गरेका थिए, जहाँ केनले भामोस भामोस भन्दै चिच्याइरहेका थिए । 

त्यो क्लिपले निकै चर्चा पायो, धेरैले यी बच्चा को होलान् भनेर चासो दिए । उनी यामालको भाइ हो भन्ने थाहा पाएपछि स्टेडियममा पुगेका फोटो ग्राफरहरुले पनि खोजी गर्न थाले । 

क्वार्टरफाइनलमा बेल्जियमविरुद्धको खेलमा पनि केनले धेरैलाई रमाइलो बनाइदिए । त्यतिबेला उनले प्याराफिटमा गरेको सेलिब्रेसन, अनुहार र मुखको हाउभाउ हेर्नलायक थियो । 

केन यो विश्वकपमा आफ्नो इनर्जेटिक सेलिब्रेसन र गेम सकिएपछि आफ्ना दाइसँग खुशी साटेका कारण चर्चामा आइरहेका छन् । तर यस्ता गतिविधि उनले कुनै योजनावद्ध गरेका होइनन्, उनको बालशुलभ गतिविधि हो । 

केनको जन्म सन् २०२२ को सेप्टेम्बरमा भएको हो । यामाल र केनका आमा एकै हुन्, तर बाबु फरक । यामालकी आमा सैला इबानाले यामालका बाबुसँग सम्बन्ध विच्छेद गरेर अर्को बिहे गरेकी थिइन् । त्यसैले यामाल र उनका भाइको उमेरको अन्तर १६ वर्ष छ । 

फाइनलमा आफ्नो छोरा यामालको खेल हेर्न आमा शैला इबाना आफ्ना नजिकका साथी र परिवारका सदस्यसँग स्टेडियममा आएकी थिइन् । केन पनि आमासँगै स्टेडियम आएका थिए ।  उनले पनि यामालकै १९ नम्बरको जर्सी लगाएकी थिइन् । 

यो विश्वकपमा मात्र होइन, यामालले खेल्ने धेरैजसो खेल हेर्न केन स्टेडियम पुगेका हुन्छन् । सन् २०२४ मा स्पेनले युरोकपको उपाधि जित्दा पनि केन दाजु यामालसँग सेलिब्रेसन गर्न पुगेका थिए । उनी बार्सिलोनाको खेल भएका बेला पनि निरन्तर जाने गरेका छन् ।

यामालले जम्मा १९ वर्षकै उमेरमा युरो कप र विश्वकपको उपाधि उचालिसकेका छन् । विश्वकप फाइनलमा अर्जेन्टिनाविरुद्ध उनी पुरै समय मैदानमा रहे । उनले राम्रो खेल पनि खेलेका थिए, तर गोल गर्न भने सकेनन् ।