मेसीका लक्की चार्म, लियोनेल स्कालोनी

उनी अर्जेन्टिनाको प्रशिक्षक बन्दा धेरै मान्छे अचम्ममा परेका थिए । 

डिएगो म्याराडोनाले त भनेका थिए, ‘उनी ट्राफिक कन्ट्रोल त गर्न सक्दैनन्, अर्जेन्टिनालाई कसरी सम्हाल्छन् ?

उनले यति ठूलो जिम्मेवारी धान्न सक्छन् भन्ने प्रश्न सबैतिर उठेको थियो । 

स्कालोनीमाथि अविश्वासको कारण थियो, उनी आफ्नो खेल जीवनमा औसत खेलाडी थिए । अनि व्यवसायिक प्रशिक्षण करिअर थालेको ३ वर्ष पनि पुगेको थिएन । 

लियोनेल स्कालोनी सन् १९९५ देखि २०१५ सम्म फुटबल खेलाडी थिए । युरोपका केही क्लब र अर्जेन्टिनी क्लबबाट व्यवसायिक फुटबल खेले । अर्जेन्टिनाको राष्ट्रिय टिमबाट ७ खेल खेले । सन् २००६ को विश्वकपमा उनी र लियोनेल मेसी दुबै जना अर्जेन्टिनी टिमका सदस्य थिए । 

जब सन् २०१८ को विश्वकपमा अर्जेन्टिनाले अन्तिम १६ मा फ्रान्ससँग ४–३ को लज्जास्पद हार ब्यहोर्‍यो, तब अर्जेन्टिनी फुटबल असोसिएसनले प्रशिक्षक जर्ज साम्पाओलीलाई बर्खास्त गर्‍यो । अनि साम्पाओलीकै सहायक स्कालोनीलाई अन्तरिम प्रशिक्षक बनायो । 

त्यो बेला अर्जेन्टिनाका लागि खराब समय चलिरहेको थियो । 

सन् २०१६ मा कोपा अमेरिकाको फाइनल हारेपछि सन्यास घोषणा गरेका लियोनेल मेसी टिममा त फर्किएका थिए, तर विश्वकपमा भोगेको हारले उनी पनि निराश थिए । 

मेसी व्यवसायिक फुटबल खेल्न स्पेनमा थिए र अर्जेन्टाइन टोलीबाट टाढै रहन चाहन्थे । मेसीलाई उपाधिविहीन देखेर समर्थक निराश थिए । 

अर्जेन्टिनीहरु मेसी र अरु खेलाडीसँग सन्तुष्ट थिएनन् । विभिन्न क्लबबाट खेलेर लाखौं डलर कमाउने तर देशका लागि खेल्न नसक्ने आरोप उनीहरुमाथि थियो । 

जब स्कालोनीले अर्जेन्टाइन क्लब सम्हाल्ने जिम्मेवारी पाए, शान्त रहेर आलोचना सुने । बरु टिम बिलयो बनाउने भित्री रणनीतिहरु बनाउन थाले । 

उनले पहिले लियोनेल मेसीलाई विश्वासमा लिए । उनले मेसीलाई भने, म तिमीलाई टिममा राख्न चाहन्छु, स्कालोनीको सम्मानपूर्ण व्यवहारले मेसी टोलीमा फर्किएर पुनः नेतृत्व सम्हाल्न तयार भए । 

यसपछि स्कालोनीले ठूला स्टारहरुलाई भन्दा टोलीका लागि रगत–पसिना बगाउने युवा खेलाडीमाथि बढी भरोसा गर्न थाले । रोड्रिगो डि पाल, एमी मार्टिनेज र क्रिस्टियन रोमेरो जस्ता खेलाडीहरुलाई टिममा ल्याए । 

खासमा मेसीलाई उनले मियो बनाएर टोलीलाई एकीकृत गरे । सन् २०१९ को कोपा अमेरिकामा टोली तेस्रो भएपछि फेरि स्कालोनी सबैको निशानामा परे । तर, उनी धर्मराएनन्, बरु झन् प्रतिवद्ध भएर आए  । 

स्कालोनीको नेतृत्वमा अर्जेन्टिनाले सन् २०२१ को कोपा अमेरिकाको उपाधि जित्यो । ब्राजिललाई उसकै घरेलु मैदान माराकाना स्टेडियममा हराएर २८ वर्ष लामो उपाधि खडेरी तोड्यो । 

त्यसपछि फुटबल पण्डितहरुले स्कालोनीको शैलीलाई मिसाएर अर्जेन्टाइन फुटबल टिमलाई नयाँ नाम दिए, ‘ला स्कालोनेटा’ । त्यसपछि मेसी र अर्जेन्टिनाका लागि प्रशिक्षक मात्रै हैन, लक्की चार्म नै बने स्कालोनी । 

तर, वास्तविक परीक्षा कतार विश्वकप २०२२ मा हुँदै थियो । अर्जेन्टिना पहिलो खेलमै साउदी अरेबियासँग २–१ ले पराजित भयो । फेरि स्कालोनीमाथि प्रश्न उठ्यो । 

तर,उनी आत्तिएनन्, आफ्नो रणनीति बदले । उनले इन्जो फर्नान्डेज र जुलियन अल्भारेज जस्ता युवा प्रतिभालाई सिधै मैदानमा उतारे । त्यसपछि अर्जेन्टिाइन टोली अन्तिम सेकेन्डसम्म पनि मैदानमा हार नमान्ने लडाकुहरुको फौज जस्तो भयो । अर्जेन्टिनाले एकपछि अर्को गर्दै विपक्षीहरुलाई पन्छाउँदै फाइनलको यात्रा तय गर्‍यो ।

फुटबल इतिहासकै सबैभन्दा रोमाञ्चक फाइनलमा फ्रान्सलाई पेनाल्टी सुटआउटमा पराजित गर्दै अर्जेन्टिनाले ३६ वर्षपछि विश्वकप ट्रफी उचाल्यो । मेस्सीको सपना पूरा भयो र स्कालोनी विश्वकै उत्कृष्ट रणनीतिकारका रुपमा स्थापित भए ।

जस्तोसुकै दबाबमा पनि कुल रहने र आफ्ना खेलाडीमाथि विश्वास गर्ने स्कालोेनीको स्वभावका प्रशंसक विश्वभरि फैलिए । 

विश्वकप जितेपछि पनि अर्जेन्टिनी टोली चुप बसेन । सन् २०२४ को कोपा अमेरिका पनि जित्यो । स्कालोनीको प्रशिक्षणमा अर्जेन्टिनाले एउटा विश्वकप र दुई वटा कोपा अमेरिकाको उपाधि जित्यो । सन् २०२२ र २०२६ मा लगातार दुई पटक विश्वकपको फाइनल खेल्यो । यद्यपि २०२६ मा उपाधि जित्न सकेन । 

अपमान सहेर सुरु भएको स्कालोनीको प्रशिक्षण यात्रा अहिले विश्व फुटबलकै लागि प्रेरणा बनेको छ ।