सुरक्षा माग्दै डाक्टरले छाडे बिरामी उपचार

डाक्टरहरु सुरक्षा भएन भनेर बिरामी जाँच्न छाडिरहेका छन् ।

यता बिरामीहरु डाक्टर नपाएर छटपटिरहेका छन् । 

काम गर्न सुरक्षा नभएको भन्दै आज देशभरका डाक्टरहरुले इमर्जेन्सीका बिरामी मात्र जाँचे । अस्पतालहरुमा ओपीडीमा दैनिक हजारौं बिरामीले स्वास्थ्य जाँच गराउँछन् । तर आज ओपीडीमा डाक्टरहरु बिरामी जाँच्नै बसेनन् । 

साउन ९ गते वीरगञ्जको नारायणी अस्पतालमा चिकित्सक र स्वास्थ्यकर्मीमाथि कुटपीट हुनुका साथै अस्पतालमा पनि तोडफोड भएको थियो । 

त्यसपछि सुरक्षा माग्दै प्रशासन कार्यालय पुगेका डाक्टरहरुलाई प्रमुख जिल्ला अधिकारी र सुरक्षाकर्मीहरुले दुव्र्यवहार गरेका डाक्टरहरुले बताएका छन् । त्यसैको विरोधमा देशभरिका डाक्टर आन्दोलनमा आएका हुन् । 

आज नारायणी अस्पतालका सबै डाक्टरहरुले सामूहिक राजीनामा समेत दिएका छन् । उनीहरुले असुरक्षा भएको भन्दै काम गर्न नसक्ने बताएका छन् । 

सरकारले डाक्टरहरुलाई आन्दोलन छाडेर बिरामीको उपचारमा लाग्न आग्रह गरेको छ । तर सरकार र डाक्टरहरुबीच वार्ता हुन सकेको छैन । नेपाल चिकित्सक संघले सर्वपक्षीय भेला गरेर थप आन्दोलन घोषणा गर्ने बताएका छन् । 

सरकारले पनि आन्दोलनरत डाक्टरलाई सुरक्षाको प्रत्याभूति दिलाएर काममा फर्काउन सकेको छैन । जसले गर्दा सर्वसाधारण भने मर्कामा परिरहेका छन् ।