राप्रपाले सरकारलाई भन्यो : साम्प्रदायिक विवादको दीर्घकालीन समाधान खोज

राष्ट्रिय प्रजातन्त्र पार्टीले तराई मधेशमा हिंसा तथा साम्प्रदायिक विवादको दीर्घकालीन समाधान खोज्न सरकारलाई आग्रह गरेको छ ।

शुक्रबार बसेको केन्द्रीय समिति बैठकले यस्ता घटनाको कारण, पृष्ठभूमि, योजनावद्ध पक्ष र सुरक्षा व्यवस्थाका कमजोरी तथा प्रशासनिक उत्तरदायित्वसमेतको गहिरो अध्ययन गरी जरासम्म पुग्न आग्रह गरेको छ ।

'पटकपटक दोहोरिरहेको यस्ता घटनालाई सधैंको लागि अन्त्य गर्न सर्वपक्षीय समिति बनाइ सरकारले तत्काल संवादको थालनी गरोस् र आगामी दिनमा यसप्रकारका घटना हुने छैनन् भन्ने सुनिश्चितता प्रदान गरोस् भन्ने राप्रपाको धारणा रहेको छ' केन्द्रीय समितिको निर्णयपछि प्रवक्ता मोहनकुमार श्रेष्ठले जारी गरेको विज्ञप्तिमा भनिएको छ ।

राप्रपाले प्रहरीको गोली प्रहार सुनसरी र सिरहामा मानिसको ज्यान जानुमा भिड व्यवस्थापनमा गम्भीर प्रशासनिक कमजोरी देखिएको उल्लेख गरेको छ ।

'राज्यले संयमता गुमाउँदा र परिस्थितिको सही विश्लेषण नगर्दा तराई मधेस क्षेत्रमा तनावपूर्ण अवस्था सिर्जना गर्न बल पुग्न गएको छ। समस्याको समाधान दमन र गोली प्रहारबाट खोजिनु उपयुक्त हुदैन', राप्रपाले विज्ञप्तिमा भनेको छ ।

राप्रपाले घटनाको निष्पक्ष, स्वतन्त्र तथा विश्वसनीय अनुसन्धान गरी दोषीमाथि कानुनबमोजिम कारबाही गर्न तथा पीडितलाई न्याय दिलाउन राप्रपा सरकारसँग माग गरेको छ ।

श्रृंखलाबद्ध हिंसात्मक घटनाप्रति राज्यको उदासीनताका कारण देश द्वन्द्व उन्मुख हुने सम्भावना रहेको भन्दै राप्रपाले सबै पक्षलाई विश्वासमा लिएर दीर्घकालीन शान्तिको राष्ट्रिय अठोटको गन्तव्य तय गर्न सरकारको ध्यानाकर्षण गराएको छ ।

हेर्नुहोस् राप्रपाको विज्ञप्ति :