अन्तत पक्राउ पर्‍यो गहना लुट्ने कर्मा तामाङको गिरोह

काठमाडौंमा श्रृङ्खलावद्ध सुनका गरगहना लुट्ने समूहको बिगबिगी थियो । प्रहरीलाई हैरान बनाएको थियो ।

यो समूहले महिला तथा वृद्धहरुलाई निशाना बनाइरहेको थियो । प्रतिकार गर्न खोजे घाँटी थिच्थ्यो, कुटपिट गरेर घाइते बनाउँथ्यो । विशेष गरी कोटेश्वर, बानेश्वर, पेप्सीकोला र बनेपा क्षेत्रमा सिक्री लुट्नेहरुको आतंक थियो । 

विगतमा भएका लुटपाट र घटनाहरुको अध्ययनबाट प्रहरी थाहा पायो, यो काम कर्मा तामाङको समूहले गरिरहेको छ । र, यो समूहका सबैलाई पक्राउ गर्न प्रहरी सफल भएको छ ।
 
गएको असार १३ गते बिहान ४ बजे शान्तिनगरमा तरकारी किन्न जाँदै गरेकी एक महिलालाई बाइकमा आएका दुई जनाले पेप्सीकोला कताबाट जान्छ भनेर सोधे । उनले बाटो बताइदिएर अगाडि बढिन् । 
उनीहरु पछाडिबाट आएर घाँटीबाट सुनको सिक्री लुटेर लग्यो । पीडित महिलाले साढे दुई तोलाको सिक्री लगाएकी थिइन् ।

त्यस्तै असार १५ गते बिहान साढे ३ बजे कोटेश्वरमा एक जना गाडी पार्किङ गरेर घरतिर जाँदै थिए । नचिनेका मानिसहरुले आएर जडिबुटी जाने बाटो कता हो भनेर सोधे । उनले बाटो बताइदिए र घरतिर लागे । मोटरसाइकलमा आएका मान्छेहरुले उनलाई धकेलेर लडाए, कुटपिट गरे र ३ तोलाको सिक्री लुटेर लगे । 

असार १५ गते नै राति ८ बजे काभ्रेको धुलिखेलमा दूध लिन आएकी एक महिलालाई मुख छोपेर आएका युवकहरुले लछार पछार गर्दै कुटपिट गरे । अनि एक तोला २० लालको सिक्री लुटेर लगे ।

श्रृङ्खलावद्ध रुपमा भइरहेको चोरी प्रहरीका लागि समेत टाउको दुखाइ बनिसकेको थियो । त्यसैले प्रहरीले विगतमा भएका लुटपाट र घटनाहरुको अध्ययन गयो । कर्मा तामाङतिर सुइ सोझियो ।

कर्माको खोजीमा रहेको प्रहरीले साउन १५ गते काभ्रेको बनेपाबाट ४ जना सहयोगीलाई पक्राउ गर्‍यो । 

कर्माको बसोबास र आवतजावतका आधारमा प्रहरीले उनी बूढानीलकण्ठ नगरपालिका–१३ चुनिखेलमा बस्ने थाहा पायो । साउन १६ गते राति साढे १० बजे प्रहरी टोली पुग्यो चुनिखेलको गाम्चास्थित पानी ट्याङ्की नजिक । त्यहीँ भेटिए कर्मा तामाङ । तर प्रहरी टोलीमाथि नै उनले खुकुरी हाने । 

प्रहरीले दुई राउन्ड हवाइ फायर गर्‍यो । उनी मोटरसाइकल चढेर माग्न खोजे । अनि प्रहरीले उनलाई घुडामुनि गोली हानेर पक्राउ गर्‍यो । अहिले कर्मा राष्ट्रिय ट्रमा सेन्टरमा उपचार गराइरहेका छन् ।

सिन्धुपाल्चोकका कर्मा पेशाले ड्राइभर हुन् । तर उनी सुनका गहना र मोटरसाइकल लुटपाट गर्ने गिरोहका नाइके हुन् । 

यो समूहले महिला र बृद्धाहरुलाई टार्गेट गरेर लुटपाट गथ्र्यो । अनि मोटरसाइकल चोरी गथ्र्यो । त्यो पनि २२० सीसीको पल्सर । चोरी गरेका मोटरसाइकलको नम्बर प्लेट फेर्र्ने अनि गहना चोरीमा प्रयोग गर्ने गथ्र्यो । 

यो समूहमा कर्मा बाहेक सिन्धुपाल्चोकका कर्माको समूहमा काभ्रेका ३० वर्षका प्रतिमान गोले, काभ्रेकै ३० वर्षका पासाङ घिसिङ, ३६ वर्षका मनोज तामाङ र कास्कीका २९ वर्षका आले गुरुङ रहेका छन् ।

प्रतिमान डाका चोरी मुद्दामा नख्खु कारागारमा सजाय भोगिरहेका थिए । गत वर्ष भदौ २४ गते नख्खु कारागारबाट कैदी भाग्दा उनी पनि भागेका थिए । पछि पक्राउ परेर पुनः कारागार पठाइए । सजाय काटेर तीन हप्ताअघि मात्र छुटेका थिए । 

त्यस्तै पासाङ घिसिङ मोटरसाइकल चोरीमा कुख्यात थिए । उनले कर्मा समूहलाई मोटरसाइकल चोरेर उपलब्ध गराउँथे । प्रहरीका अनुसार २० भन्दा बढी मोटरसाइकल चोरीमा उनको संलग्नता छ ।
आले गुरुङचाहिँ लुटपाटको समयमा बल प्रयोग गर्ने गर्थे । उनी घटनास्थल वरिपरि हतियारसहित बस्ने गर्थे । 

मनोज तामाङ चाहिँ सुन पसले हुन् । उनी बनेपामा सुनको कारोबार गर्छन् । चोरेर ल्याएको सुन उनले गालेर स्वरुप परिवर्तन गर्ने गर्छन् । पक्राउ परेकाहरु अहिले जिल्ला प्रहरी परिसर काठमाडौंको हिरासतमा छन् ।