एउटा शहरजत्रै ठूलो एयरपोर्ट

युरोपको सबैभन्दा व्यस्त मध्येको एक फ्रयांकफर्ट एयरपोर्ट अहिले विश्वव्यापी चर्चाको शिखरमा छ ।

यहाँ ४ अर्ब युरो अर्थात् लगभग ५ खर्ब नेपाली रुपैयाँ भन्दा बढीको लागतमा एउटा नयाँ शहरजत्रै विशाल टर्मिनल निर्माण भएको छ । एक दुई वर्ष हैन, १० वर्षको निरन्तर मिहिनेतपछि तयार भएको यो टर्मिनल–३ आखिर किन यति धेरै चर्चामा छ ?  

जर्मनीको मुख्य हवाई प्रवेशद्वार हो, फ्रयाङ्कफर्ट एयरपोर्ट । बर्सेनि करोडौँ यात्रु आवतजावत गर्छन् । तर पछिल्ला वर्षहरुमा पुराना टर्मिनल १ र २ मा बढ्दो भीड र चाप सम्हाल्न निकै चुनौती भइरहेको थियो । 

यही समस्याको स्थायी समाधानका लागि फ्रयाङ्कफर्ट एयरपोर्ट सञ्चालक फ्रापोर्टले युरोपकै सबैभन्दा ठूलो निजी पूर्वाधार परियोजनाको रूपमा टर्मिनल–३ को निर्माण सुरु गरेका थिए । यो टर्मिनल–३ को आकार र क्षमता सुन्नुभयो भने तपाईं अचम्म पर्नुहुनेछ । यो लगभग २५ वटा फुटबल मैदान बराबरको विशाल क्षेत्रमा फैलिएको छ । 

पूर्ण रूपमा सञ्चालनमा आउँदा यसले वार्षिक २ करोड ५० लाख यात्रुहरुलाई सहजै सेवा दिन सक्ने क्षमता राख्छ । यसमा मुख्यतया तीनवटा विशाल पियर्सका साथै १०० भन्दा बढी आधुनिक चेक–इन काउन्टरहरु निर्माण गरिएका छन् ।

टर्मिनलभित्र यात्रुलाई झन्झटमुक्त बनाउन अत्याधुनिक प्रविधिको प्रयोग गरिएको छ । सुरक्षा जाँचका लागि २१ वटा नयाँ आधुनिक स्क्यानरहरु राखिएका छन्, जसले गर्दा यात्रुले अब झोलाबाट ल्यापटप वा तरल पदार्थ ननिकालिकन द्रुत चेकिङ गराउन सक्छन् । 

पुराना टर्मिनलहरुसँग जोड्नका लागि उच्च गतिको स्काइलाइन पिपुल मुभर रेल बनाइएको छ, जसले मात्र ८ मिनेटमा टर्मिनल १ बाट टर्मिनल ३ पुर्‍याउँछ ।

यो टर्मिनल केवल आधुनिक मात्र होइन, प्राकृतिक प्रकाश र वातावरणमैत्री र दिगो पनि छ । विश्वभरका यात्रुहरूका लागि पूर्ण रुपमा खुला हुन लागेको फ्र्याङ्कफर्टको यो टर्मिनल–३ ले युरोपेली उड्डयन र इन्जिनियरिङ क्षेत्रमा नयाँ स्टान्डर्ड तय गर्दैछ ।