'प्रज्वलनशील पदार्थसम्म आगो पुगेको भए काठमाडौं के हुन्थ्यो ?'

२२ चैत, काठमाडौं । गृहमन्त्री रमेश लेखकले १५ चैतको घटनामा संविधानलाई समाप्त पार्ने र हिंसामार्फत व्यवस्था उल्ट्याउने उद्देश्यले भएको बताएका छन् । साथै उनले संविधान र गणतन्त्रको रक्षाका लागि सरकार प्रतिवद्ध रहेको बताए ।

प्रतिनिधिसभाको राज्य व्यवस्था तथा सुशासन समितिको शुक्रबार बसेको बैठकमा गृहमन्त्री लेखकले तीनकुने घटनामा भएको क्षतिको विवरण दिए ।  

शान्तिपूर्ण रुपमा कार्यक्रम गर्छौं भनेपछि स्थानीय प्रशासनले अनुमति दिएको उनले बताए । तर अराजकता फैलाएर संविधान र व्यवस्था समाप्त पर्ने उद्देश्यले गतिविधि भएको उनले बताए । निजी घर, दलको कार्यालयमा समेत तोडफोड र आगजनी भएको भन्दै गृहमन्त्री लेखकले भने, ‘एयरपोर्टको नजिक आगजनी गर्ने काम भएको छ । आगो यति नजिक पुगेको छ कि नजिकै अन्तर्राष्ट्रिय उडानका विदेशी जहाजहरु थिए । त्यत्रो ठूलो तेलको भण्डारण थियो ।’

‘यस्तो हुन्छ आन्दोलन ? यस्तो हुन्छ प्रदर्शन ? यही हो लोकतन्त्रको उपयोग गरेर आफ्ना कुरा राख्ने तरिका ? ‘यो कुनै राजनीतिक मान्यतामा उभिएर गरेर काम होइन', गृहमन्त्री रमेश लेखकले भने ।

उनले अगाडि भने, ‘जडिबुटीतर्फ पनि ठूलो मात्रामा प्रज्वलनशील तरल पदार्थ थियो । यतिसम्म जोखिम थियो कि यदि प्रज्वलनशील पदार्थसम्म आगो पुगेको भए आज काठमाडौंको स्थिति के हुन्थ्यो ? हामी भयावह ढंगले अनुमान मात्र गर्न सक्छौं ।’

उनले तीनकुनेमा जे जे भयो त्यस आधारमा त्यो कार्यक्रमलाई राजनीतिक कार्यक्रम भन्न नसकिने बताए । ‘यस्तो हुन्छ आन्दोलन ? यस्तो हुन्छ प्रदर्शन ? यही हो लोकतन्त्रको उपयोग गरेर आफ्ना कुरा राख्ने तरिका ?’ उनले भने, ‘यो कुनै राजनीतिक मान्यतामा उभिएर गरेर काम होइन । यो संविधान समाप्त गर्ने र हिंसात्मक गतिविधिबाट संघीय लोकतान्त्रिक गणतन्त्रात्मक व्यवस्थालाई उल्याउने एक मात्र उद्देश्य अन्तरनिहीत छ ।’

गृहमन्त्री लेखकले हिंसात्मक गतिविधिलाई ढाकछोप गर्न अनर्गल प्रचार भएकोमा समेत असन्तुष्टि जनाए । ‘कहाँबाट टियर ग्यास फालियो, कहाँबाट पहिल्यै बल प्रयोग गरियो भनेको छ’, उनले भने, ‘मान्छे घरभित्र छ, बाहिरबाट आगो लगाएको छ । सरकारका कारण मान्छे पोलियो भन्या छ, यसरी अनर्गल प्रचार गरेर हिंसात्मक गतिविधिलाई पुष्टि गर्न खोजिएको छ ।’