रसुवा बाढी प्रभावितका लागि एक्स्ट्रिम इनर्जी ड्रिङ्क्सले १ करोड दिने 

भोटेकोशीमा आएको भीषण बाढीबाट प्रभावित नागरिकको उद्दार, राहत र पुनर्स्थापनाका लागि एक्ट्रिम इनर्जी ड्रिंक्सले १ करोड रुपैयाँ सहयोग घोषणा गरेको छ । 

विपदको घडीमा प्रभावित परिवार र सर्वसाधारणको पीडा न्यूनिकरण गर्न तथा उद्दार, राहत र पुनर्स्थापनामा सरकारलाई साथ दिन प्रधानमन्त्री दैवीप्रकोप उद्दार कोषमा १ करोड रुपैयाँ सहयोग गर्ने कम्पनीले जनाएको छ । 

कम्पनीले विपदको समयमा जोखिम मोलेर उद्दार र राहतमा खटिएका सुरक्षाकर्मी, स्वास्थ्यकर्मी स्वयंसेवक, स्थानीय समुदाय, सरकारी र गैरसरकारी निकायप्रति सम्मान व्यक्त गरेको छ । अनि बाढी प्रभावित नागरिकप्रति गहिरो समवेदना, घाइतेहरुको शीघ्र स्वास्थ्य लाभको कामना र ज्यान गुमाउनेहरुप्रति श्रद्धाञ्जली अर्पण गरेको छ । 

बुधबार विहान रसुवामा भोटेकोशी नदीमा आएको बाढीले रसुवा र नुवाकोट जिल्लाका नदी किनारका धेरै बजार बगाएको छ । अहिलेसम्म कति मानिसको मृत्यु भयो, कति घाइते, बेपत्ता र घरबारविहीन भए भन्नेसमेत पत्ता लाग्न सकेको छैन । बिहीबार विहानसम्म नदी किनारका बस्तीहरुमा उद्दारको काम चलिरहेको छ ।