नेपाल बारको अध्यक्षमा सत्तारुढ निकटको प्यानल नै निर्वाचित

वकिलहरुको छाता संस्था नेपाल बार एशोसिएसनको अध्यक्षमा वरिष्ठ अधिवक्ता डा. विजयप्रसाद मिश्र निर्वाचित भएका छन् । 

बिहीबार सकिएको मतगणना अनुसार मिश्रले ५ हजार ५२ मत पाएका छन् । उनलाई नेपाली कांग्रेस निकट डेमोक्रेटिक लयर्स एशोसिएसन र नेकपा एमाले निकट  प्रगतिशील तथा पेशागत कानुन व्यवसायी संगठनको समर्थन थियो । 

माओवादी केन्द्रसहितका विपक्षी दल निकटका कानुन व्यवसायीका उम्मेदवार वरिष्ठ अधिवक्ता रमणकुमार श्रेष्ठले २ हजार ६२१ मत ल्याएका छन् । 

कार्यसमितिको सबै पदमा कांग्रेस र एमाले निकट कानुन व्यवसायीको प्यानलले जितेको छ । 

कोशी प्रदेश उपाध्यक्षमा पदमप्रसाद लिम्बु ५ हजार २०० मत ल्याएर निर्वाचित भएका छन् । मधेश उपाध्यक्षमा अजयशंकर झा  ५ हजार २५२ मत ल्याएर निर्वाचित भए । बागमती उपाध्यक्षमा तेजबहादुर रावल ५ हजार ६ र गण्डकी उपाध्यक्षमा भूपेन्द्र रावल ५ हजार ५६ मत ल्याएर निर्वाचित भए । 

त्यस्तै लुम्बिनी उपाध्यक्षमा कृष्णप्रसाद पोख्रेल ५ हजार १६७, कर्णाली उपाध्यक्षमा विवशकुमार बस्नेत ५ हजार ४४ र सुदूरपश्चिम उपाध्यक्षमा सिद्धराज ओझा ५ हजार १५१ मत ल्याएर निर्वाचित भए । 

महिला उपाध्यक्षमा सरस्वती श्रेष्ठ ४ हजार ६२० मत ल्याएर निर्वाचित भइन् । महासचिवमा केदारप्रसाद कोइराला ४ हजार ८७४ मत ल्याएर निर्वाचित भए । माओवादीसहितका दलका समर्थन पाएका उम्मेदवार यज्ञमणि न्यौपानेले २ हजार ३६७ मत पाए । 

कोषध्यक्षमा जगतबहादुर कार्की ५ हजार ८७ मत ल्याएर निर्वाचित भए । 

बारको कार्यसमिति सदस्यमा चिरञ्जीवि तिलक्यानी, सूर्यकुमार यादव, रिंकुकुमारी यादव, राजकुमार श्रेष्ठ, मंगलसुन्दर शिल्पकार, इन्दिरा आचार्य, रञ्जिता कार्की, किरण पौडेल निर्वाचित भएका छन् । 

त्यस्तै किरण न्यौपाने, शारदा गुरुङ, दमनबहादुर चन्द, बाबुराम अर्याल, डा. मुकुन्द अधिकारी र माधव मैनाली पनि बारको कार्यसमिति सदस्य निर्वाचित भएका छन् ।