बालेनका स्वकीय सचिव र नगर प्रहरी प्रमुखलाई कारबाही गर्न कर्मचारीको माग

काठमाडौं महानगरपालिकाका कर्मचारीहरुले महानगर प्रमुख राजु पाण्डेलाई निलम्बन गर्न र मेयर बालेन शाहका स्वकीय सचिव भूपदेव शाहलाई कारबाही गर्न माग गरेका छन् । 

महानगरपालिकामा क्रियाशील पाँचवटा कर्मचारी संघ संगठनले बिहीबार प्रमुख प्रशासकीय अधिकृत सरोज गुरागाईंलाई ११ बुँदे ज्ञापन पत्र बुझाएका छन् । 

ज्ञापन पत्रमा कर्मचारीहरुले गत चैत २१ गते महानगर प्रहरी बलका प्रमुख राजु पाण्डेको अगुवाइमा कार्यालयमा मर्यादाविपरीत, अनुशासनहीन र गैरकानुनी काम भएको भन्दै यो घटनाको छानबिन गर्न समिति गठनको माग गरेका छन् । 

चैत २१ गते प्रमुख प्रशासकीय अधिकृत सरोज गुरागाईं काठमाडौं महानगरपालिकामा हाजिर गर्न आएका थिए त्यस क्रममा नगर प्रहरी बल उनलाई रोक्न लागेको थियो भने कर्मचारी र जनप्रतिनिधिको एक समूह उनलाई जसरी पनि हाजिर गराउन लागेको थियो ।

त्यतिबेला दुईपक्षबीच धकेलाधकेलकै स्थिति आएको थियो । कर्मचारीहरुले उक्त घटनाको छानबिनका लागि ३ दिनभित्र अधिकार सम्पन्न समिति गठनको माग गरेका छन् । 

मेयर बालेनका स्वकीय सचिव भूपदेव शाहले त्यस दिन सार्वजनिक सञ्चार माध्यममा उपप्रमुख र जनप्रतिनिधिलाई लाञ्छना लगाउने गरी अभिव्यक्ति दिएको भन्दै कर्मचारीहरुले उनलाई पनि कारबाहीको माग गरेका छन् । 

बालेनका स्वकीय सचिव शाहले प्रमुख प्रशासकीय अधिकृतले गरेको भ्रष्टाचारको जिम्मा उपप्रमुख र वडाध्यक्षहरुले पनि लिनुपर्ने भनी सञ्चार माध्यमहरुलाई प्रतिक्रिया दिएका थिए । 

स्थानीय तह कर्मचारी युनियन, स्थानीय तह कर्मचारी संघ, महानगर कर्मचारी परिषद, नेपाल यातायात स्वतन्त्र मजदुर संगठन र नेपाल वातावरण तथा सरसफाइ श्रमिक संघले बिहीबार निकालेको विज्ञप्तिमा नगर प्रमुख बालेन शाहको सचिवालयले कर्मचारीबारे अफवाह फैलाउने र धम्की दिने काम गरेको भन्दै आपत्ति जनाइएको छ । 

जसमा बालेनको सचिवालयका कर्मचारी र सल्लाहकारले कर्मचारीलाई असहयोग गर्ने, कर्मचारीप्रति वितृष्णा जगाउने र कर्मचारीबारे अफवाह फैलाउने गरेको आरोप पनि लगाइएको छ । 

‘...अनधिकृत व्यक्तिले मौखिक आदेश दिने, तयस्तो आदेश नमान्ने कर्मचारीलाई अपमानित गर्ने, धम्क्याउने प्रवृत्ति बढ्दै गएकाले यस्तो प्रवृत्ति व्यवहारिक रुपमा नै अन्त्य गरियोस्’, पाँच कर्मचारी संगठनले निकालेको विज्ञप्तिमा भनिएको छ । 

कर्मचारीहरुले काठमाडौं टावरको नक्सापास प्रक्रियासम्बन्धी घटनाको छनाबिनका लागि अर्को निष्पक्ष छानबिन समिति बनाउन पनि माग गरेका छन् ।

हेर्नुहोस् कर्मचारीहरुको ज्ञापनपत्र