वीरगञ्जमा दुई समुदायबीच झडप, प्रशासनले लगायो कर्फ्यू

पर्साको वीरगञ्जमा दुई समुदायबीच झडप भएपछि स्थानीय प्रशासनले कर्फ्यू लगाएको  छ ।

वीरगञ्ज महानगरपालिका छपकैयामा हनुमान जयन्तीको शोभायात्रा निकाल्ने क्रममा छपकैया चोकमा दुई समुदायबीच झडप भएको थियो । 

झडपपछि स्थितिलाई नियन्त्रणमा लिन जिल्ला प्रशासन कार्यालय पर्साले शनिबार साँझ साढे ६ बजेदेखि कर्फ्यू लगाएको हो । कर्फ्यु आदेश आइतबार दिउँसो १२ बजेसम्म लागू हुने प्रमुख जिल्ला अधिकारी गणेश अर्यालले जानकारी दिए । 

पूर्वमा भेडियाही चोक, पश्चिममा सिर्सिया पुल, उत्तरमा गण्डक चोक र दक्षिणमा शंकराचार्य गेट चार किल्लाभित्र आवतजावत गर्न, भेला जुलुस गर्न, प्रदर्शन, सभा, बैठक आदि गर्न निषेध गरिएको छ । 

छपकैया चोकमा झडपका क्रममा क्रममा मूल सडक छेउका केही पसलमा आगजनी समेत भएको छ । झडपमा केही स्थानीय र प्रहरीसमेत घाइते भएका छन् । 

हेर्नुहोस् कर्फ्युको सूचना