ओली, देउवा र प्रचण्डबीच के भयो कुराकानी ?

प्रमुख तीन राजनीतिक दलका शीर्ष नेताले संविधान र यसको उपलब्धी जोगाउन गणतन्त्र पक्षधर शक्ति एक ठाउँमा उभिने सहमति गरेका छन् । 

प्रधानमन्त्री तथा नेकपा एमालेका अध्यक्ष केपी शर्मा ओली, नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल प्रचण्डबीच शनिबार भेट भएको थियो ।

भेटमा संविधानको उल्लंघन गर्ने र सामाजिक अराजकता सिर्जना गरी मुलुकको शान्ति र अमनचयन खलल पुर्‍याउनेप्रति सचेत भएर अघि बढ्ने सहमति भएको भेटमा सहभागी प्रधानमन्त्रीका मानव अधिकार तथा संक्रमणकालीन न्यायसम्बन्धी सल्लाहकार अग्नि खरेलले जानकारी दिए । 

उनका अनुसार संविधानको उपलब्धी जोगाउन प्रमुख राजनीतिक दलहरुसहित गणतन्त्र पक्षधर शक्तिहरु एक ठाउँमा उभिनुपर्नेमा समान मत देखिएको छ । 

भेटमा तीन नेताका साथै खरेल र गृहमन्त्री रमेश लेखक पनि सहभागी थिए । नेताहरुबीच संक्रमणकालीन न्यायसम्बन्धी दुई आयोगमा पदाधिकारी चयनको विषयमा पनि छलफल भएको छ । 

सत्य निरुपण तथा मेलमिलाप आयोग र बेपत्ता व्यक्तिको छानबिन आयोगको पदाधिकारीहरु सिफारिसका लागि सरकारले पूर्वप्रधानन्यायाधीश ओमप्रकाश मिश्रको संयोजकत्वमा एक समिति गठन गरेको छ । 
प्रधानमन्त्रीका सल्लाहकार खरेलका अनुसार आयोगको क्यालेण्डर र हालसम्म भएको प्रगतिको विषयमा छलफल भएको छ । 

‘सिफारिस समितिले संविधान र कानुन बमोजिम काम गरिरहेको छ । जे भइरहेको छ, ठीकै ढंगले अगाडि बढिरहेको छ’, उनले भने । 

चैत ११ गते बसेको मन्त्रिपरिषद बैठकले संक्रमणकालीन न्यायसम्बन्धी आयोगको पदाधिकारी सिफारिस गर्न मिश्र नेतृत्वमा समिति गठन गरेको थियो । सो समितिले २ महिनाभित्र आयोगका पदाधिकारी सिफारिस गर्नुपर्ने कानुनी व्यवस्था छ । 

यसअघि मिश्र नेतृत्वकै समितिले संक्रमणकालीन न्यायसम्बन्धी आयोगको पदाधिकारी सिफारिस नगरी २ महिना समय गुजारेको थियो । पछि सरकारले पुनः उनकै नेतृत्वमा सिफारिस समिति गठन गरेको थियो ।