राप्रपालाई गृहको चेतावनी : निषेधित क्षेत्रमा प्रदर्शन गरे सह्य हुँदैन 

आफ्ना नेताहरु पक्राउको विरोधमा निषेधित क्षेत्रमा प्रदर्शन गर्ने घोषणा गरेको राप्रपालाई गृह मन्त्रालयले चेतावनी दिएको छ । 

राप्रपाको वैशाख ४ गते बसेको केन्द्रीय कार्यसम्पादन समितिको बैठकले वैशाख ७ गते निषेधित क्षेत्रमा प्रदर्शन गर्ने निर्णय गरेको छ । पार्टी प्रवक्ता मोहन श्रेष्ठका अनुसार राप्रपाले आइतबार काठमाडौंको बिजुलीबजारमा प्रदर्शन गर्नेछ । 

तर गृह मन्त्रालयले शनिबार साँझ एक विज्ञप्ति जारी गरी कानुन बमोजिम निषेधित क्षेत्र तोकेको ठाउँमा प्रदर्शन गरे सह्य नहुने चेतावनी दिएको छ । 

गृह मन्त्रालयका प्रवक्ता रामचन्द्र तिवारीले जारी गरेको विज्ञप्तिमा भनिएको छ, ‘संविधान र कानुनको ठाडो उल्लंघन गर्न प्रोत्साहित गर्ने र समाजमा अराजकता फैलाउने कुनै पनि गतिविधि सह्य नहुने र यस्तो गतिविधिमा संलग्न जोसुकैलाई कानुन बमोजिम कारबाही हुने व्यहोरा सूचित गरिन्छ ।’ 

गृह मन्त्रालयले हिंसा फैलाउने, अराजक, उत्तेजक र गैरकानुनी क्रियाकलापमा संलग्न नहुने पनि अपिल गरेको छ । 

गत चैत १५ गते तीनकुनेमा राजावादीहरुले गरेको प्रदर्शन उग्र हुँदा २ जनाको मृत्यु भएको थियो भने सरकारी उद्योग, पार्टी कार्यालय, व्यक्तिगत घर र व्यापारिक प्रतिष्ठानहरुमा आगजनी र तोडफोड भएको थियो । 

सोही घटनामा संलग्नको आरोपमा राप्रपाका वरिष्ठ उपाध्यक्ष रवीन्द्र मिश्र र महामन्त्री धवलशमशेर राणा पक्राउ परेका छन् । राप्रपाले उनीहरुको रिहाइको माग गर्दै निषेधित क्षेत्र तोड्ने आन्दोलनको कार्यक्रम राखेको हो ।

हेर्नुहोस् गृह मन्त्रालयको विज्ञप्ति