शिक्षामन्त्री भट्टराईले दिइन् राजीनामा

शिक्षा, विज्ञान तथा प्रविधिमन्त्री विद्या भट्टराईले राजीनामा दिएकी छन् । 

सामुदायिक विद्यालयका शिक्षकहरुले शिक्षा ऐन जारी गर्न माग गर्दै आन्दोलन गरिरहेका बेला उनले राजीनामा दिएकी हुन् । 

उनले सोमबार प्रधानमन्त्री केपी शर्मा ओलीलाई भेटेर राजीनामा बुझाएकी उनी निकट स्रोतले जानकारी दिएको छ । भट्टराई गत असार ३१ गते शिक्षामन्त्रीमा नियुक्त भएकी थिइन् । 

शिक्षकहरुको माग वार्ताबाट समाधान गर्न उनी निरन्तर प्रयासरत थिइन् । तर शिक्षकहरुले शिक्षा मन्त्रालय र शिक्षामन्त्रीसँग वार्ता अस्वीकार गर्दै आएका थिए । 

पछिल्लो समय शिक्षकहरुसँग प्रधानमन्त्री ओली आफैंले संवाद अगाडि बढाएका थिए । 

संसदको शिक्षा समितिबाट शिक्षा विधेयक छिटो टुंग्याउन पनि उनले पहल गरिरहेकी थिइन् । तर आफूले पहल गर्दा पनि शिक्षकहरुले आन्दोलन फिर्ता नलिएपछि उनले राजीनामा दिएको स्रोतको भनाइ छ ।