शिक्षकहरुको आन्दोलनले कक्षा १२ को परीक्षा नरोकिने

सामुदायिक विद्यालयका शिक्षकहरु आन्दोलनमै रहेका बेला कक्षा १२ को परीक्षा सञ्चालन हुने भएको छ । राष्ट्रिय परीक्षा बोर्डले वैशाख ११ गतेदेखि तोकिएको कक्षा १२ को परीक्षा नरोकिने निर्णय गरेको छ । 

बोर्डको मंगलबार बसेको बैठकले परीक्षा केन्द्र तोकिएको विद्यालयमा परीक्षा सञ्चालनको आवश्यक तयारी गर्न जिल्लाको परीक्षा समन्वय समितिलाई निर्देशन दिएको छ । त्यस्तै परीक्षा सञ्चालनका लागि सबैलाई पुनः अनुरोध गर्ने निर्णय पनि गरिएको राष्ट्रिय परीक्षा बोर्डका अध्यक्ष महाश्रम शर्माले जानकारी दिए । 

बैठकपछि पत्रकारहरुसँग उनले भने, ‘परीक्षा भनेको विद्यार्थीहरुको सेन्सेटिभ विषय हो, त्यसैले परीक्षा सञ्चालनका लागि शिक्षकहरुलाई पनि अनुरोध गर्ने निर्णय भएको छ ।’ 

यस वर्ष करिब साढे ५ लाख विद्यार्थीले कक्षा १२ को परीक्षा दिँदैछन् । तर सामुदायिक विद्यालयका शिक्षकहरु आन्दोलनमा भएका कारण परीक्षा के हुने भन्ने अन्योल थियो । 

नेपाल शिक्षक महासंघले कक्षा १२ को परीक्षामा सहभागी नहुन र आन्दोलन जारी राख्न शिक्षकहरुलाई आह्वान नै गरेको छ । 

राष्ट्रिय परीक्षा बोर्डले भने शिक्षकहरु नआए निजामती कर्मचारीको सहयोग लिएर भए पनि परीक्षा सञ्चालन गर्ने तयारी गरेको छ ।