रवि लामिछानेको बन्दी प्रत्यक्षीकरण रिट अब संयुक्त इजलासमा

रवि लामिछानेलाई रिहा गर्न माग गर्दै परेको बन्दी प्रत्यक्षीकरणको रिट संयुक्त इजलासमा सुनुवाइ हुने भएको छ ।

मंगलबार न्यायाधीश अब्दुल अजिज मुसलमानको इजलासले रविको हकमा बन्दी प्रत्यक्षीकरणको रिट जारी हुनुपर्ने हो कि होइन लिखित जवाफ पेश गर्नू भनी विपक्षी नेपाल सरकारका नाममा आदेश दिएको छ । 

विपक्षी नेपाल सरकारले लिखित जवाफ पेश गरेपछि भने यो मुद्दा संयुक्त इजलासले सुनुवाइ गर्नेछ । 

सहकारी ठगीको मुद्दामा उच्च अदालत तुलसीपुरको बुटवल इजलासको आदेशपछि रवि लामिछाने चैत २५ गतेदेखि जिल्ला कारागार रुपन्देहीमा पुर्पक्षका लागि थुनामा छन् ।

उनलाई गैरकानुनी रुपमा थुनामा राखेको भन्दै पत्नी निकिताले वैशाख ७ गते सर्वोच्च अदालतमा बन्दी प्रत्यक्षीकरण रिट दायर गरेकी थिइन् । 

सो रिट यसअघि वैशाख ८ गते न्यायाधीश हरि फुयालको इजलासमा परेको थियो । तर न्यायाधीश फुयालले आफूले हेर्न नमिल्ने आदेश गरेका थिए ।