ललितपुर र पोखराबीच एनएसएलको उपाधि भिडन्त

नेपाल सुपर लिगको उपाधिका लागि ललितपुर सिटी एफसी र पोखरा थन्डर्सबीच प्रतिस्पर्धा हुने भएको छ । 

बुधबार भएको क्वालिफायर्स टु को खेलमा धनगढी सीटी एफसीलाई १ –० ले हराउँदै पोखराले ललितपुरसँग उपाधि भिडन्त पक्का गरेको हो । 

पोखराको जितमा क्यामरुनी खेलाडी स्टेफेन समीर विनोङले खेलको अन्तिम समयमा गोल गरे । आयुस घलानले दिएको कर्नर पासमा विनोङले हेडमार्फत गोल गरेका थिए । 

त्यही गोल पोखरालाई फाइनल प्रवेशका लागि पर्याप्त भयो । बुधबारको खेलमा डिफेन्डर गौरव श्रेष्ठ रातो कार्ड खाएर बाहिरिएपछि पोखरा १० खेलाडीमा सीमित भएको थियो । 

यसअघि गत शनिबार भएको क्वालिफायर्समा धनगढीलाई २–१ ले हराउँदै ललितपुर एनएसएलको फाइनलमा पुगेको थियो ।