डाक्टरहरुले भेटे स्वास्थ्यमन्त्री, तर आन्दोलन रोक्न अस्वीकार 

११ वैशाख, काठमाडौं । स्वास्थ्य तथा जनसंख्यामन्त्री प्रदीप पौडेलले आवासीय डाक्टरलाई ४८ हजार ७३७ रुपैयाँ निर्वाह भत्ता दिने चिकित्सा शिक्षा आयोगको निर्णयबाट सरकार पछि नहट्ने बताएका छन् । 

बिहीबार आन्दोलनरत डाक्टरहरुसँगको छलफलमा मन्त्री पौडेलले निजी मेडिकल कलेजहरुले आवासीय डाक्टरलाई ४८ हजार ७३७ निर्वाह भत्ता नदिए सरकारले दिने सुविधा कटौती गर्ने पनि बताएका छन् । 

निजी मेडिकल कलेजहरुले आवासीय डाक्टरहरुलाई हाल २० हजार हाराहारी मात्र निर्वाह भत्ता दिइरहेका छन् । २०८१ माघ २५ गते बसेको चिकित्सा शिक्षा आयोगको बैठकले आवासीय चिकित्सकलाई आठौं तहको मेडिकल अधिकृतलाई सरह मासिक ४८ हजार ७३७ रुपैयाँ निर्वाह भत्ता दिने निर्णय गरेको थियो । 

तर दुई महिनासम्म पनि बढेको निर्वाह भत्ता नपाएपछि निजी मेडिकल कलेजका आवासीय डाक्टरहरु सडक आन्दोलनमा छन् । डाक्टरहरुको छाता संस्था नेपाल चिकित्सक संघ पनि बिहीबारदेखि आवासीय डाक्टरहरुको आन्दोलनमा साथ दिँदै सडक प्रदर्शनमा आएको छ । 

माइतीघर मण्डलमा आन्दोलनपछि चिकित्सक संघका पदाधिकारीले स्वास्थ्य मन्त्रालयमा गएर मन्त्री प्रदीप पौडेललाई भेटेका थिए । त्यस क्रममा मन्त्री पौडेलले आवासीय डाक्टरलाई ४८ हजार ७३७ रुपैयाँ भत्ता दिने निर्णयबाट सरकार पछि नहट्ने बताएका हुन् । 

‘निजी मेडिकल कलेजहरुले आयोगले तोकेको निर्वाह भत्ता दिनुभएन भने सरकारले उहाँहरुलाई दिने सुविधाहरु कटौती गर्छौं’, मन्त्री पौडेलले छलफलका क्रममा भने । 
तर निजी मेडिकल कलेज सञ्चालकको पनि केही समस्या भए सरकारले सुन्नुपर्ने भन्दै एमबीबीएस र बीडीएसको सिट र शुल्क समायोजनबारे अध्ययन गर्न गठित कार्यदललाई काम गर्न दिन आग्रह गरे । 

चिकित्सा शिक्षा आयोगको वैशाख ३ गते बसेको १८ औं बैठकले चिकित्सा शिक्षाको शुल्क र सिट समायोजनबारे अध्ययन गर्न स्वास्थ्य सचिव विकास देवकोटाको संयोजकत्वमा ११ सदस्यीय कार्यदल गठन गरेको छ । 

चिकित्सक संघका अध्यक्ष डा. अनिलबिक्रम कार्कीले स्वास्थ्यमन्त्रीको प्रतिवद्धता उधारो रहेको बताए । निजी मेडिकल कलेजले आवासीय डाक्टरलाई ४८ हजार ७३७ रुपैयाँ निर्वाह भत्ता नदिएसम्म आन्दोलन नरोकिने उनले बताए । 

चिकित्सक संघले आवासीय डाक्टरको माग पूरा नभएसम्म आकस्मिक र आईसीयूबाहेकका सेवा ठप्प पार्ने निर्णय गरिसकेको छ । ‘रेजिडेन्ट डाक्टरले पैसा पाउने सुनिश्चित नभएसम्म हाम्रो आन्दोलन रोकिँदैन’, उनले भने ।