देउवा बैंककमा हुँदैमा ओलीको फोन

सरकार परिर्वतनको हल्ला चलेपछि प्रधानमन्त्री केपी शर्मा ओलीले थाइल्याण्डको बैंकक भ्रमणमा रहेका नेपाली कांग्रेसका सभापति शेरबहादुर देउवालाई टेलिफोन गरेका छन् । 

पछिल्लो समय माओवादी अध्यक्ष प्रचण्डले सरकार ढल्ने दाबी गर्दै आएका छन् । बिहीबार संसदीय दलको बैठकमा उनले कांग्रेस सभापति देउवा बैंकक जानु अगाडि फोनमा कुराकानी भएको र फर्किएर आएपछि थप सम्वाद हुने बताएका थिए। 

परराष्ट्रमन्त्री आरजु देउवाका अनुसार प्रधानमन्त्री ओलीले बिहीबार नै देउवासँग फोनमा सम्वाद गरेका हुन् । शुक्रबार स्वदेश फर्किएकी उनले त्रिभुवन विमानस्थलमा सञ्चारकर्मीहरुसँग कुरा गर्दै नेपालमा मनोरञ्जनका लागि मात्र सरकार परिवर्तनको हल्ला चलाइएको दाबी गरिन् ।

सरकार परिर्वतन गर्न नेपालभित्रै हुनुपर्ने होला, विदेशमा गएर त सरकार परिवर्तन हुँदैन', कांग्रेस सभापति देउवाकी पत्नीसमेत रहेकी उनले भनिन्, ‘यस्तो समाचार सुनेर हामी पनि छक्क पर्‍यौं ।’