क्यानडामा सत्तारुढ लिबरल पार्टी बहुमत नजिक

क्यानडामा प्रधानमन्त्री मार्क कार्नीको लिबरल पार्टीले आम चुनावमा बहुमत हासिल गर्ने सम्भावना देखिएको छ । मतगणना जारी रहँदा हाउस अफ कमन्समा लिबरल पार्टीले १६५ सिटमा अग्रता लिएको छ । 

क्यानडाको संसदमा बहुमत हासिल गर्न १७२ सिट जित्नुपर्छ । दोस्रो स्थानमा रहेको कन्जरभेटिभ पार्टीले १४७ स्थानमा अग्रता लिएको छ । 

क्यानडाका सञ्चार माध्यमहरुले चुनावी नतिजापछि हालका प्रधानमन्त्री मार्क कार्नी नै प्रधानमन्त्रीमा दोहोरिने सम्भावना रहेको बताएका छन् । तर सरकार निर्माणका लागि साना पार्टीहरुको समर्थन लिनुपर्ने देखिएको छ । 

तत्कालिन प्रधानमन्त्री जस्टिन ट्रुडोले राजीनामा दिएपछि उनी गत मार्चको सुरुमा प्रधानमन्त्री नियुक्त भएका थिए । 

क्यानडामा लिबरल पार्टीकै नेता जस्टिन ट्रुडो प्रधानमन्त्री रहँदा उनी र पार्टीको लोकप्रियता घटेको थियो । तर उनले राजीनामा दिएर मार्क कार्नी प्रधानमन्त्री नियुक्त भएपछि भने लिबरल पार्टीको लोकप्रियता बढ्न थालेको थियो । 

त्यही बेला अमेरिकामा डोनाल्ड ट्रम्प राष्ट्रपति बनेका थिए । उनले क्यानडालाई अमेरिकाको ५१ औं राज्य बनाउने अभिव्यक्ति दिनेदेखि क्यानडाको उत्पादनमा कर वृद्धि गरेका थिए । 

त्यसैले क्यानडामा अमेरिकाविरुद्ध लड्नसक्ने नेतृत्वको खोजी भएको थियो । 

विपक्षी कन्जरभेटिभ पार्टीका नेता पेरी पोलिभरलाई धेरै क्यानडेलीले अर्को डोनाल्ड ट्रम्प भनेका थिए भने प्रधानमन्त्री मार्क कार्नीलाई ट्रम्पसँग लड्न सक्ने उपयुक्त पात्र ठानेका थिए । 

चुनावको प्रारम्भिक नतिजापछि प्रधानमन्त्री मार्क कार्नीले समर्थकमाझ सम्बोधन गरेका थिए । त्यस क्रममा उनले भनेका छन्, ‘मेरो सरकारले तपाईहरुका लागि काम गर्नेछ । उनले क्यानडा घर भएका हरेक व्यक्तिको आफूले राम्रोसँग प्रतिनिधित्व गर्ने भन्दै लिबरल पार्टीलाई मत नदिनेहरुको पनि विश्वास जित्न खोजेका छन् । 

उनले अमेरिकी राष्ट्रपति डोनाल्ड ट्रम्पले क्यानडेलीहरुलाई विभाजन गर्न खोजेको तर त्यस्तो कहिल्यै नहुने बताएका छन् ।