'ज्ञानेन्द्रका ज्वाइँ, रवि लामिछानेको रास्वपा र राजेन्द्र महतोको राजनीति'

बुद्धछिरिङ मोक्तान हाल राजेन्द्र महतो नेतृत्वको राष्ट्रिय मुक्ति पार्टीका नेता हुन् । 

सिन्धुपाल्चोकका मोक्तान बाल्यकालमा कम्युनिस्ट राजनीतिमा आकर्षित थिए । गाउँको विद्यालयमा पढाउने शिक्षकहरुले उनलाई कम्युनिस्ट राजनीतितिर तानेका थिए । 

उनी अहिलेको अवस्थालाई विशाल अनिश्चितता र भ्रमको समय भन्न रुचाउँछन् । तर अहिलेको कांग्रेस र कम्युनिस्ट पार्टीसँग यसलाई हटाउने राजनीतिक योजना नभएको मोक्तानको भनाइ छ । 

यो पडकास्टमा बुद्धछिरिङले राखेको विचारको सारसंक्षेप : 

• ग्लोबल अर्डर परिवर्तन भएजस्तै नेपालमा पनि राजनीतिक अर्डर परिवर्तन हुँदैछ । 
• नेपालमा विवेकशील साझा पार्टी नैतिक अभियान जस्तो भयो, तर राजनीतिक योजना ल्याउन सक्नुभएन । राजनीतिक योजना ल्याउने क्षमता उहाँहरुमा देखिँदैन । 
• पूर्वराजा ज्ञानेन्द्र शाहका ज्वाइँ राजबहादुर सिंहसँग मिलेर पनि राजनीति अघि बढाउने प्रयास गरेँ । उनी जनता दलको केन्द्रीय सदस्य थिए र मन्त्री बन्ने चाहना थियो । 
• मलाई पनि केही मानिसले उनीसँग भेट गराए । मैले उनलाई शाहवंशीय परिवारबाट नयाँ नेताको रुपमा उदाउन सक्नुहुन्छ भनेँ । 
• नेपालमा २०६२/०६३ को आन्दोलनपछि नेपाल पुँजीपतिहरुको कब्जामा जान थाल्यो । त्यसअघि राज्यसत्ता कर्मचारीतन्त्रको कब्जामा थियो । 
• राज्यसत्ता पुँजीपतिको कब्जामा भएपछि राज्यसत्ता कब्जा गर्न युद्ध गरिरहन आवश्यक पर्दैन । 
• नेपालको राजनीतिमा हिंसाको प्रयोग सबैले गरे । बीपीले पनि गरे, कम्युनिस्टहरुले त गर्ने नै भइहाले । 
• नेपालमा कसैले आफूलाई खाँटी मधेशी मान्छ भने त्यो राजेन्द्र महतो हो ।अरु साथीहरुले मधेशीको नाममा राजनीति गरिरहेका छन्, तर मधेशी ठानिँदैनन् । 
• त्यसैले नेपालमा पहिचानको राजनीतिको बिम्ब छ भने राजेन्द्र महतो मात्र हो । भौतिक रुपमा धोती लगाउने पनि राजेन्द्र महतो मात्र हो । 
• पहाडमा पहिचानको राजनीतिको बिम्ब कोही छैन ।