विदेशमा पढ्ने विद्यार्थीको सुरक्षा सुनिश्चित गर्न सभामुखको रुलिङ

प्रतिनिधिसभाले विदेशमा अध्ययनरत नेपाली विद्यार्थीको सुरक्षाको सुनिश्चित गर्न सरकारलाई निर्देशन दिएको छ । 

भारतको ओडिसास्थित कलिंगा इन्ष्टिच्युट अफ टेक्नोलोजी (केआईआईटी) मा अध्ययनरत नेपाली विद्यार्थी प्रिसा शाहको गत बिहीबार राति शंकास्पद मृत्यु भएको थियो । 

यो विषयमा संसदको आकस्मिक र शून्य समयमा धेरै सांसदहरुले कुरा उठाएका थिए । उनीहरुले केआईआईटीमा अध्ययनरत प्रिशा साहको मृत्युको सत्य तथ्य पत्ता लगाउन माग गर्दै आएका थिए । त्यस्तै विदेशमा अध्ययनरत नेपाली विद्यार्थीको सुनिश्चित गर्न पनि माग गरेका थिए । 

आज सभामुख देवराज घिमिरेले यो विषयमा संसदको ध्यानाकर्षण भएको बताउँदै विदेशमा अध्ययनरत विद्यार्थीको सुरक्षा सुनिश्चित गर्न सरकारलाई रुलिङ गरेका हुन् । 

उज्यालो भविष्यको सपना बोकेर अधययनका लागि विदेशिएका विद्यार्थीको एकपछि अर्को मृत्युको घटना राष्ट्रको संवेदनशीलता र जिम्मेदारीसँग जोडिएको विषय भएको उनले बताए । 

सभामुख घिमिरेले सरकारलाई यस घटनाप्रति गहिरो चासो लिँदै सत्य तथ्य पत्ता लगाउन सम्बन्धित पक्षसँग संवाद अघि बढाउन र परिवारलाई आवश्यक न्यायिक सहयोग गर्न पनि निर्देशन दिएका छन् ।