अपरेसन सिन्दुर : भारतको २५ मिनेट, पाकिस्तानमाथि ९ निशाना

भारतीय सुरक्षा अधिकारीहरुका अनुसार मंगलबार रातिदेखि पाकिस्तान र पाकिस्तान प्रशासित कश्मिरका ९ ठाउँमा आक्रमण गरिएको छ । 

भारतले यसलाई अपरेशन सिन्दुर नाम दिएको छ र, पहलगाम अक्रमणका पीडितहरुको न्यायका लागि आक्रमण गरेको दाबी गरेको छ । 

भारतले आतंकवादी समूहको मुख्यालय र तालिम केन्द्रहरुमा हमला गरेको दाबी पनि गरेको छ । 

यस क्रममा भारतीय फौजले अन्तर्राष्ट्रिय सीमाबाट करिव १०० किलोमिटरको दुरीमा रहेको स्थानलाई समेत निशाना बनाएको छ । 

पाकिस्तानी अधिकारीहरुले भने भारतीय आक्रमणमा निहत्था नागरिकलाई निशाना बनाएको दाबी गरेका छन् । र, यसको उचित जवाफ दिने बताएका छन् । 

२२ अप्रिलमा जम्मू कश्मिरको पहलगाममा आतंकवादी समूहले एक नेपालीसहित २६ जनाको हत्या गरेका थिए । 

त्यसयता भारतमा मोदी सरकारमाथि पाकिस्तानमा सैन्य कारबाहीका लागि निरन्तर दबाव बढेको थियो । 

मंगलबार राति भने भारतले ‘अपरेसन सिन्दुर’ नाममा पाकिस्तानमा हवाइ हमला गर्‍यो । 

यसबारे जानकारी दिन भारतीय विदेश मन्त्रालयले बुधबार  पत्रकार सम्मेलन गरेको थियो । जसमा कर्णेल सोफिया कुरैसी र विङ कमाण्डर योमेका सिंहले अपरेसन सिन्दुरबारे जानकारी दिएका छन् । 

अपरेसन सिन्दुर राति १ बजेर ५ मिनेटदेखि १ बजेर ३० मिनेटसम्म चलेको थियो । 

यो आक्रमणमा ९ वटा आतंकवादी क्याम्पलाई लक्षित गरिएको थियो र, सबैलाई तहसनहस गरिएको भारतको दाबी छ । 

कहाँ कहाँ भयो आक्रमण ? विस्तृत जानकारी माथिको भिडियोमा