राजावादीहरुले काठमाडौंमा जेठ ८ देखि जागरण सभा गर्ने

राजसंस्था पुनर्स्थापनाका लागि संयुक्त जनआन्दोलन समितिले जेठ १५ देखि हुने आन्दोलनमा सहभागिता जुटाउन विभिन्न कार्यक्रम घोषणा गरेको छ । 

आइतबार राप्रपाको कार्यालयमा बसेको समितिको बैठकले जेठ ६ गते राजसंस्था र हिन्दू राष्ट्रपति आस्था राख्ने प्रवुद्ध व्यक्तिहरुको भेला गर्ने र जेठ ८, ९, १० र ११ गते काठमाडौंमा जनजागरण यात्रा गर्ने निर्णय गरेको छ । 

जनजागरण यात्रा जेठ ८ गते साँखुबाट सुरु गर्ने र जेठ ११ गते भक्तपुरको चाँगुनारायणमा अन्त्य गर्ने संयोजक नवराज सुुवेदीले जानकारी दिए । 

त्यस्तै आन्दोलनमा सहभागिता जुटाउन उपत्यकाबाहिर बाट पनि काठमाडौं आउन आह्वान गर्ने समितिले जनाएको छ । त्यसका लागि जेठ १५  गते काठमाडौं जाउँ नारासहित अभियान सञ्चालन हुने जनआन्दोलन समितिले जनाएको छ । 

समितिले तीनकुने घटनामा संलग्नताको आरोपमा हाल हिरासतमा रहेकाहरुलाई रिहा गर्न सरकारसँग माग गरेको छ ।