अमेरिका र चीन एक अर्कामाथि चर्को कर घटाउन सहमत

अमेरिका र चीन एक अर्काको सामानमा लगाइरहेको चर्को कर तत्कालका लागि घटाउन सहमत भएका छन् । 

अमेरिका र चीन दुबै पक्ष बुधबारदेखि लागू हुने गरी ९० दिनका लागि एक अर्काको सामानमा ११५ प्रतिशत कर घटाउन सहमत भएका हुन् । 

अमेरिकी अर्थ सचिव स्कट बेसेन्ट र चीनका उपप्रधानमन्त्री हे लिफेङबीचको वार्तापछि दुबै देश ९० दिनका लागि चर्को घर घटाउन सहमत भएका हुन् ।

यो सहमतिपछि अमेरिकाले चिनियाँ सामानमा लगाएको कर ३० प्रतिशतमा झर्नेछ भने चीनले अमेरिकी सामानमा लगाएको कर १० प्रतिशतमा झर्नेछ । 

अमेरिकाले चिनियाँ सामानमा १४५ प्रतिशत कर लगाएको थियो भने चीनले अमेरिकी सामानमा १२५ प्रतिशत कर लगाएको थियो । 

दुबै देशले अर्थतन्त्र र व्यापार सम्बन्धबारे नियमित छलफल गर्न एक संयन्त्र पनि बनाएका छन् । 

अमेरिका र चीनबीच १ फेब्रुअरीदेखि व्यापार युद्ध सुरु भएको थियो । अमेरिकाले फेब्रुअरी १ मा चिनियाँ सामानमा १० प्रतिशत भन्सार कर लगाएर व्यापार युद्ध सुरु गरेको थियो । 

अप्रिल ३ तारेखमा अमेरिकी राष्ट्रपति डोनाल्ड ट्रम्पले विश्वभरका देशलाई १० देखि ४५ प्रतिशतसम्म कर लगाएका थिए । त्यतिबेला चीनका सामानमा ३४ प्रतिशत कर घोषणा गरिएको थियो । 

त्यसपछि अमेरिका र चीन दुबैले टिट फर ट्याट शैलीमा कर वृद्धि गर्दै आएका थिए । राष्ट्रपति डोनाल्ड ट्रम्पले अरु देशलाई लगाएको कर ९० दिनका लागि स्थगित गरे पनि चीनको ट्यारिफ भने बढाएका थिए । 

त्यसको जवाफमा चीनले पनि अमेरिकी सामानमा कर बढाइरहेको थियो ।