लुम्बिनीमा जनमत पार्टीकी सांसदले दिइन् राजीनामा

लुम्बिनीमा जनमत पार्टीकी सांसद गीता गुरुङले पदबाट राजीनामा दिएकी छन् । उनले मंगलबार प्रदेशसभाका सभामुख तुलाराम घर्तीलाई पत्र लेखेर राजीनामा दिएकी छन् । 

सार्वजनिक भएको उनको राजीनामा पत्रमा आफू पदमा रहिरहन र जनताको करबाट तलब लिन उपयुक्त नभएको उल्लेख गरेकी छन् । 

प्रदेशसभा सचिवालयकी प्रवक्ता कमला पोखरेल पौडेलका अनुसार सांसद गुरुङको राजीनामा पत्र आइपुगेको छैन । सांसद गुरुङ पछिल्लो समय प्रदेशसभा बैठकमा आउन छाडेकी थिइन् । 

लुम्बिनीमा २०८१ मंसिर १६ गते सुरु भएको पाचौं अधिवेशन २०८१ फागुन ६ गतेसम्म चलेको थियो । यस अवधिमा १० वटा बैठक भएका थिए । तीमध्ये सांसद गुरुङ तेस्रो र पाचौं दुईवटा बैठकमा मात्र उपस्थित भएकी थिइन् ।