सांसदहरुले भने– गभर्नर नियुक्तिमा राष्ट्रकै बेइज्जत 

विपक्षी सांसदहरुले गभर्नर नियुक्तिमा राष्ट्रकै बेइज्जत भएको भन्दै सरकारको आलोचना गरेका छन् । 

बुधबार प्रतिनिधिसभा बैठकमा बोल्दै नेकपा माओवादी केन्द्रकी सांसद रेखा शर्माले दुई तिहाइको बलियो सरकारले एउटा गभर्नर नियुक्ति गर्न नसक्नुको कारण के होला ? भनेर प्रश्न गरिन् । 

सत्तारुढ दलको स्वार्थ नमिलेर गभर्नर नियुक्ति हुन नसकेको चर्चा भइरहेको भन्दै उनले राष्ट्रकै बेइज्जती नगर्न र सक्षम र योग्य व्यक्तिलाई गभर्नर नियुक्ति गर्न माग गरेकी छन् । 

राप्रपाकी सांसद रोशन कार्कीले गभर्नर पद लिलामीमा चढेको टिप्पणी गरिन् । लिलामी रकम साढे ३ करोड नाघेको सुनेको उनले बताइन् । 

सांसद कार्कीले कार्यबाहक गभर्नर निलम ढुंगानालाई नै गभर्नर नियुक्ति गर्न माग गरिन् । संसदमा उनले भनिन्, ‘यता र उता योग्य र अयोग्य मान्छे खोज्न नलागौं, यसले देशको स्थिति अत्यन्त हास्यास्पद भइसक्यो ।’