नेपाली महिला क्रिकेट टिम विश्वकपको ग्लोबल छनोटमा

नेपाली महिला क्रिकेट टोलीले ऐतिहासिक सफलता हात पारेको छ । सोमबार यूएईलाई ५ विकेटले पराजित गर्दै नेपाल पहिलो पटक टी–२० विश्वकपको ग्लोबल छनोटमा पुगेको हो ।

ग्लोबल छनोटको अन्तिम स्थानका लागि सोमबार सुपर थ्रीमा नेपाल र यूएईबीच प्रतिस्पर्धा भएको थियो । 

इन्दु बर्माको कप्तानी पारीसँगै नेपालले यूएईलाई ५ विकेटले हरायो । यो जितसँगै नेपाली महिला टोलीले पहिलो पटक टी–२० विश्वकपको ग्लोबल छनोटमा स्थान बनायो । 

११५ रनको लक्ष्य पछ्याएको नेपालले ३८ रन जोड्दा महत्वपूर्ण तीन विकेट गुमाइसकेको थियो । तर कप्तान इन्दु वर्माले कप्तानी पारी खेलिन् । 

उनले चौथो विकेटका लागि पूजा महतोसँग २४ रनको महत्वपूर्ण साझेदारी गरिन् । 

पूजा व्यक्तिगत १३ रनमा आउट भइन् । त्यसपछि पाँचौं विकेटका लागि रुविना क्षेत्रीसँग ३७ रनको साझेदारी गरिन् । 

रुविना २३ रनमा आउट भइन्, त्यतिबेला नेपाललाई जितका लागि अझै १६ रन चाहिएको थियो । 

तर इन्दुले रुबी पोदारसँग मिलेर नेपाललाई जित दिलाइन् । इन्दु ३० रनमा अविजित रहिन् ।