कर्मचारीको तलब बढेन, महंगी भत्ता ५ हजार पुर्‍याउने घोषणा 

१५ जेठ, काठमाडौं । सरकारले निजामती कर्मचारीहरुको तलब बढाएन । तर महंगी भत्ता बढाएको छ । 

अर्थमन्त्री विष्णु पौडेलले संसदमा आगामी आर्थिक वर्ष २०८२/०८३ को बजेट प्रस्तुत गर्दै आगामी साउनदेखि महंगी भत्ता बढाएर मासिक ५ हजार पुर्‍याएको घोषणा गरे ।  हाल सरकारी कर्मचारीले महंगी भत्ताबापत मासिक दुई हजार रुपैयाँ पाउँदै आएका छन् । 

कर्मचारीको तलब वृद्धि गर्नुपर्ने आवश्यकता बोध भए पनि स्रोत अभावका कारण अपेक्षा अनुसार तलब बढाउन नसकेको अर्थमन्त्री पौडेलले बताए । 

बरु सरकारले कर्मचारी, शिक्षक र सुरक्षाकर्मीका लागि सुलभ आवास कार्यक्रम घोषणा गरेको छ । 

कर्मचारी सञ्चय कोषलगायत अवकाश कोषको अग्रसरता र निजी क्षेत्रको सहभागिटताामा सुलभ आवास कार्यक्रम ल्याइने अर्थमन्त्री पौडेलले बताए । 

जसअन्तर्गत सातै प्रदेशका प्रमुख शहरी केन्न्द्रमा एक लाख भवन तथा अपार्टमेन्ट निजामती कर्मचारी, सुरक्षाकर्मी र शिक्षक कर्मचारीलाई सहुलियतपूर्ण ब्याज र किस्ताबन्दीमा उपलब्ध गराइने बजेटमा घोषणा गरिएको छ । 

निजामती कर्मचारी र शिक्षकहरुको सहुलियतपूर्ण उपचार गर्ने निजामती कर्मचारी अस्पतालको स्तरोन्नती गर्ने पनि घोषणा गरिएको छ । 

कर्मचारी सञ्चय कोषले हाल सञ्चयकर्ताको पति तथा पत्नीलाई दिँदै आएको उपचार सहुलियत परिवारका अन्य सदस्यमा पनि विस्तार गर्ने घोषणा गरिएको छ । 

स्वीकृत दरबन्दीभित्र करार सेवामा रहेका कर्मचारी र अस्थायी राहत शिक्षकलाई योगदानमा आधारित सामाजिक सुरक्षा कोषमा आवद्ध गराउने पनि अर्थमन्त्रीले बताएका छन् । 

त्यसका लागि रोजगारदाता र योगदान कर्ताबाट १० प्रतिशत योगदानसहितको छुट्टै प्याकेज बनाइ कार्यान्वयन गर्ने बजेट वक्तव्यमा उल्लेख छ ।