रिहा भए कमल थापा, एक जना अझै हिरासतमै

आइतबार दिउँसो राजसंस्था पक्षधरको आन्दोलनका क्रममा पक्राउ परेका राप्रपा नेपालका अध्यक्ष कमल थापा रिहा भएका छन् । जिल्ला प्रहरी परिसर काठमाडौंले उनलाई साँझ रिहा गरेको हो । 

उनीसँगै पक्राउ परेका अन्य ६ जना र उनलाई भेट्न जाँदा पक्राउ परेका राप्रपा नेता दीपक सिंह पनि रिहा भएका छन् । तर कमल थापासँगै पक्राउ परेका रौतहटका डा. राजीव झा भने रिहा भएका छैनन् । 

जिल्ला प्रहरी परिसर काठमाडौंका प्रवक्ता अपिल बोहराका अनुसार उनले जाँडरक्सी खाएर प्रहरीलाई अपशब्द प्रयोग गरेकाले थप अनुसन्धानका लागि हिरासतमा लिइएको छ । 

आइतबार दिउँसो नक्सालको नारायणचौरबाट बालुवाटारतर्फ प्रदर्शनसहित अघि बढ्ने क्रममा कमल थापा पक्राउ परेका थिए । नारायणचौरमा मात्र प्रदर्शन गर्नुपर्ने भन्दै प्रहरीले उनीहरु बालुवाटारतर्फ अघि बढेकाले पक्राउ गरेको बताएको थियो । 

रिहा भएका नेताहरुलाई राप्रपाले पार्टी कार्यालय धुम्बाराहीमा स्वागत गरेको छ । राप्रपा अध्यक्ष राजेन्द्र लिङ्देनले रिहा भएका थापासहितका नेताहरुसँग भेट गरेका छन् ।