पतञ्जलीमा एक पैसा खाएको छैन : माधव नेपाल 

पूर्वप्रधानमन्त्री माधवकुमाार नेपालले पतञ्जलीको जग्गा प्रकरणमा आफूलाई जोड्नु पूर्वाग्रहमात्र भएको बताए । 

बाराको सिमरा विमानस्थलमा पत्रकारहरुसँग कुरा गर्दै उनले आफूले भ्रष्टाचारजन्य काम नगरेको र कुनै मन्त्रीलाई कानुन विपरीत काम गर्न निर्देशन पनि नदिएको बताए । 

बिहीबारमात्र अख्तियार दुरुपयोग अनुसन्धान आयोगले पूर्वप्रधानमन्त्री माधवकुमार नेपालसहित ९३ जनाविरुद्ध भ्रष्टाचार मुद्दा दायर गरेको छ । 

पतञ्जली उद्योगका लागि हदबन्दी भन्दा बढी जग्गा राख्न दिएको र पछि त्यही जग्गा कानुन विपरीत बेच्न दिएको प्रकरणमा प्रधानमन्त्रीको हैसियतमा माधवकुमार नेपाल दोषी देखिएको अख्तियारको दाबी छ । 

उक्त मुद्दाबारे माधव नेपालले के भने उनको भनाइ जस्ताको तस्तै :

म त स्तब्ध भएँ । मैले कल्पना पनि गरेको थिइनँ । मबाट कुनै पनि अनुचित, भ्रष्टाचारजन्य  काम भएको छैन ।

मैले कसैबाट पनि एक आना पैसा लिएको छैन, भ्रष्टाचारपूर्ण काम गरेको कुनै पनि प्रमाण छैन । 

मैले कुनै मन्त्रीलाई कानुन विपरीत काम गर्न जथाभावी निर्देशन दिएको पनि छैन । जसरी यसमा मलाई जोड्न खोजिएको छ, त्यहाँ पूर्वाग्रहबाहेक केही पनि छैन ।