डोनाल्ड ट्रम्प र इलन मस्कको किन बिग्रियो सम्बन्ध ?

एक जना विश्वकै शक्तिशाली । अर्का विश्वकै धनी । 

यी दुईबीचको लडाईं कस्तो होला ? अहिले विश्वभरका मानिसले देखिरहेका छन् । 

ती हुन्, अमेरिकी राष्ट्रपति डोनाल्ड ट्रम्प र अर्बपति इलन मस्क । 

अहिले दुबै एक अर्काविरुद्ध उत्रिएका छन् । उनीहरुको बीचको झगडाले कुन रुप लिन्छ अहिले नै अनुमान गर्न कठिन छ । 

विद्युतीय गाडी टेस्ला सहितका कम्पनीका मालिक मस्कले ट्रम्प र अरु रिपब्लिकनलाई चुनाव जिताउन २८८ मिलियन डलर चन्दा सहयोग गरे । 

त्यसको बदलामा ट्रम्पले मस्कलाई डिपार्टमेन्ट अफ गभर्मेन्ट इफिसेन्सी अर्थात डोज को नेतृत्व नै सुम्पिए । ट्रम्प प्रशासनले सरकारको खर्च कटौतीको उद्देश्यले बनाएको यो निकाय निकै शक्तिशाली थियो । 

मस्कको नेतृत्वमा डोजले संघीय सरकारका हजारौं कर्मचारीको जागिर खाइदियो । युएसएड जस्तो अमेरिकी सरकारको पुरानो एजेन्सीको विश्वव्यापी कार्यक्रमहरु कटौती गरिदियो । 

मस्कको कामबाट ट्रम्प प्रशासनका धेरै अधिकारी रुष्ट थिए, त्यस्तो बेलामा पनि ट्रम्पले मस्कलाई साथ दिएका थिए । 

केही महिना अगाडिसम्म डोनाल्ड ट्रम्प र इलन मस्कबीचको मित्रतामा कसैले प्रश्न उठाउन सक्दैनथ्यो । यी दुई जना छुट्याउनै नसकिने राजनीतिक शक्तिजस्तो देखिएका थिए । 

मस्क यति शक्तिशाली देखिए कि विपक्षी दल डेमोक्र्याटका कतिपय नेताहरुले बाहिर ट्रम्प देखिए पनि खास राष्ट्रपति इलन नै भएको टिप्पणी गर्थे । 

उनीहरु सार्वजनिक सञ्चार माध्यममा एक अर्काको खुलेर प्रशंसा गर्थे । मस्कले प्रगतिशील र डेमोक्र्याटहरुविरुद्ध तिखो टिप्पणी गर्थे । 

जब जब उनीहरु अब चाहिँ छुट्न्छिन् भन्ने लाग्थ्यो, मस्क ओभल अफिस, क्याबिनेट रुम वा राष्ट्रपतिको एयर फोर्स वान फ्लाइटमा उडान भर्थे । 

गत साता भने डोजमा १३० दिन पूरा गरेर मस्क ओभल अफिसबाट बिदा भए । 

ट्रम्पले ह्वाइट हाउसको गोल्डेन कि दिएर कुनै पनि दिन फर्किन सक्ने संकेत गरेका थिए । 

तर केही दिनपछि नै ट्रम्प र मस्कको झगडा छताछुल्ल भएको छ ।  थप जानकारी भिडियोमा :