विदेशबाट फर्किंदा ल्याउने सामानमा थप कडाइ, यी हुन् फेरिएका नियम

विदेशबाट नेपाल फर्किंदै हुनुहुन्छ ?  त्यसो हो भने भन्सार नतिरी ल्याउन पाइने सामानसम्बन्धी नियम फेरिएको छ । जुन तपाईंले थाहा पाउनैपर्छ । 
सरकारले गत जेठ १५ गतेको बजेटपछि झिटिगुण्टा सम्बन्धी नियममा केही महत्वपूर्ण परिवर्तन गरेको छ । 

• पहिलो हो, मोबाइलको संख्या ।

विदेशबाट फर्किनेहरुले आफ्ना घर परिवार, आफन्त साथीभाइका लागि नयाँ मोबाइल उपहार ल्याइदिन्छन् । 
अहिलेसम्म विदेशबाट आउनेहरुले २ वटासम्म मोबाइल नेपाल ल्याउन पाउँथे । अब भने एउटा मात्रै नयाँ मोबाइल ल्याउन पाउनेछन् । 
त्यो पनि कम्तीमा ६ महिना वैदेशिक रोजगारीमा गएर फर्किएकाहरुले मात्रै यो सुविधा पाउनेछन् । अरु भिसामा विदेश गएर आउनेहरुले नयाँ मोबाइल लिएर आउन पाउने छैनन् । 
तपाईंले ल्याएको नयाँ मोबाइलको बट्टामा अब भन्सारले ‘बेच्न नपाइने’ भनेर छाप हान्ने छ । यसको अर्थ हो, अब यसरी विदेशबाट ल्याएको नयाँ मोबाइल बजारमा लगेर पसलेलाई बेच्न पाइने छैन । 
भन्सार विभागमा महानिर्देशक महेश भट्टराईका अनुसार विदेशबाट महँगा मोबाइलहरु वैदेशिक रोजगारीबाट फर्किएकाहरुलाई बोकाएर पठाउने चलन बढेको छ । ती मोबइल यहाँका पसलमै बेच्ने गरेको भेटिएपछि बक्समै बेच्न नपाइने भनेर छाप हान्न थालिएको हो । 

• दोस्रो परिवर्तन हो, मदिरासम्बन्धी ।

विदेशबाट फर्किने व्यक्तिले १ लिटरसम्मको रक्सी भन्सार नतिरी ल्याउन पाउँछ । यो त पुरानै व्यवस्था भयो । तर, अब भन्सारले रक्सीको प्याकेटमा पनि बेच्न नपाइने भनेर छाप हान्ने छ । यदि यसरी पास भएका मोबाइल र रक्सी बेचेको भेटिए भन्सार विभागले जफत गर्नेछ । 

• तेस्रो परिवर्तन हो, कुरियरको सामानको मूल्यांकन ।

अहिलेसम्म तपाईंले कुरियरबाट विदेशमा समान पठाउँदा त्यो वस्तुको मूल्य जति घोषणा गर्नुभयो, त्यति नै भन्सार तिर्दा हुन्थ्यो । तर, अब यो नियम फेरिएको छ । 
उपहारका रुपमा सामान पठाउँदा त्यो सामानको मूल्य जति परेको छ, त्यति नै उल्लेख गर्नुपर्ने व्यवस्था गरिएको छ । भन्सार अधिकृतले यस्ता समानको घोषित मूल्य र सन्दर्भ मूल्यसूची हेरेर जाँच गर्नेछ । यदि मूल्य फरक परेमा थप भन्सार तिराउनेछ ।

• भन्सारको नियममा गरिएको चौथो महत्वपूर्ण परिवर्तन हो, विदेशबाट आएका सामानको परिमाणको जाँच । 

विदेशबाट उपहारका रुपमा आएका ५ सय डलरसम्मका सामानमा भन्सार नलाग्ने व्यवस्था छ । तर, उपहारका नाममा धेरै परिमाणमा महँगा वस्तु पनि पठाउने क्रम बढेपछि यसको पनि जाँच गर्न थालिएको छ । 
यदि यस्तो जाँचमा बढी परिमाणमा वा धेरै मूल्यको समान आएको भेटिए जरिवाना लाग्नेछ । जति मूल्यको वस्तु हो, त्यति नै मूल्य तिरेर मात्रै भन्सार छुटाउन सकिने छ । 
भन्सार विभागका महानिर्देशक महेश भट्टराई उपहारका रुपमा बेच्ने उद्देश्यले धेरै कपडा र समान विदेश पठाउने गरिएकाले कडाइ गरिएको दाबी गर्छन् ।