भारतमा बढ्न थाल्यो कोरोना, नेपाल के गर्दैछ ?

भारतमा कोरोना संक्रमण दर बढेपछि नेपालमा पनि कोरोना फैलिने डर बढेको छ । भारतमा संक्रमण देखिएको १५ दिनपछि नेपालमा पनि भित्रिएको विगतको अनुभव छ ।

स्वास्थ्य तथा जनसंख्या मन्त्रालयका प्रवक्ता डा. प्रकाश बुढाथोकीले भारतसँग जोडिएका १७ वटा स्थल नाका र तीन वटा हवाइ नाका तथा त्यहाँ रहेका हेल्थ डेस्कमा कार्यरत स्वास्थ्यकर्मीहरुलाई तयारी अवस्थामा राखिएको बताए । 

नाकामा आरडिटी टेस्ट गर्दा नेगेटिभ वा पोजेटिभ जे देखिने भएपनि एक सातासम्म सेल्फ आइसोलेसनमा बस्न आग्रह गरिरहेको उनको भनाइ छ । 

सरकारले कोरोना संक्रमण फैलिए पनि उपचारका लागि पूर्वाधार र जनशक्ति अभाव नभएको बताएको छ । संक्रमण बढेको अवस्थामा पनि पहिलेको तुलनामा उपचार र व्यवस्थापन गर्न सहज हुने  स्वास्थ्य मन्त्रालयका प्रवक्ता बुढाथोकीले बताए । 

देशभरका २५ वटा हव हस्पिटल,२ हजारभन्दा बढी सेटेलाइट हस्पिटललाई पनि तयारी अवस्थामा रहने व्यवस्था गरेको उनको भनाइ छ । 

९० हजारदेखि एक लाख जनासम्मलाई सरकारी स्वास्थ्य संस्थामा उपचार गर्न सकिने मन्त्रालयको भनाइ छ ।