अमेरिकाबाट डिपोर्ट नेपाली मध्यरातमा काठमाडौं आइपुगे

अमेरिकामा अवैध रुपमा बसोबास गरिरहेका थप ३७ जना नेपाली आइतबार मध्यरात काठमाडौं आइपुगेका छन् ।

अमेरिकाले उनीहरुलाई चार्टर्ड विमानबाट काठमाडौं ल्याइदिएको थियो । मध्यरातमा काठमाडौं आइपुग्नेहरुमा ५ जना महिला र ३२ जना पुरुष छन् । 

अमेरिकामा डोनाल्ड ट्रम्प राष्ट्रपति भएपछि आप्रवासीहरु प्रति कडा नीति लिँदै आएका छन् । गत जनवरी यता नै झण्डै डेढ सय जना नेपाली अमेरिकाबाट फर्काइएका छन् । 

नेपालीहरु अवैध तरिकाले अमेरिका जान दलाललाई मोटो रकम दिएर दक्षिण अमेरिकी देशको बाटो हुँदै पनि जाने गरेका छन् । यसरी गएकाहरु स्वदेश फर्किएपछि पनि दलालविरुद्ध उजुरी दिएका छैनन् । 

भिसा प्रक्रिया पूरा नगरी गएका, भिसा अवधि भन्दा बढी समय बसेका र चालचलन राम्रो नभएका आप्रवासीलाई अमेरिकाले डिपोर्ट गर्दै आएको छ ।