सीप मेलामा सिलाइ कटाइदेखि ड्रोन उडाउनेसम्म तालिम

काठमाडौं महानगरपालिकाले जेठ ७ गतेदेखि सीप मेला चलाइरहेको छ । 

मेलामा सीप सिक्न १४ हजार ९४७ जनाले आवेदन दिएका थिए । ती मध्येबाट महानगरपालिकाले २ हजार ७१२ जनालाई छनोट भएका छन् । 

छनोट भएकामध्ये २ हजार ५१२ जना तालिममा सहभागी छन् । विभिन्न १० क्षेत्रका ३७ विधामा तालिम चलिरहेको छ । 

तालिम बिहान ७ बजेदेखि बेलुका ७ बजेसम्म चलिरहेको छ । सहभागीहरु निकै उत्साहका साथ सीप सिकिरहेका छन् । 

सीप मेलामा सबैभन्दा धेरै सहभागी भएको क्षेत्र हो गार्मेन्ट । यो तालिममा १३१ जना सहभागी छन् । 

काठमाडौंमा गार्मेन्टको क्षेत्रमा जनशक्ति अभाव छ । गार्मेन्ट उद्योगहरु भारतीय मजदुरका भरमा चलिरहेका छन् । 

अमेरिकाको नयाँ कर नीतिका कारण गार्मेन्ट उद्योगीहरु आशावादी छन् । यही बेला महानगरपालिका युवालाई गार्मेन्टमै सीप सिकाइरहेको छ । 

सिकाइ निकै प्रभावकारी भएको सहभागी बताउँछन् । 

गार्मेन्टको तालिम लिएकाले तुरुन्तै काम पाउने निश्चित भएको सीप मेला सचिवालयले पनि बताएको छ । 

सीप मेलामा अर्को नौलो र रोचक दृश्य छ, पुरोहित तालिमको । हिन्दू धर्मको कर्मकाण्ड गराउने विधि सिक्न १३२ जनाले आवेदन दिएका थिए, उनीहरुमध्ये ७६ जना छनोट भएका छन् । 

शहरी क्षेत्रमा कर्मकाण्ड सञ्चालन गर्ने मानिसको अभाव हुँदै गइरहेको छ । त्यसैले महानगरपालिकाले पुरोहित तालिम पनि सञ्चालन गरेको हो । 

अहिले शहरमा इलेक्ट्रिसियन भनेका बेलामा भेट्न मुश्किल छ । 

त्यसैले महानगरपालिकाले यसको तालिम पनि चलाइरहेको छ । इलेक्ट्रिसियन तालिम लिनेमा महिलाहरु पनि छन् । अझ प्रशिक्षक समेत महिला छन् । 

सीप मेला हेर्दा यस्तो लाग्छ कुनै पनि काम महिला वा पुरुषले गर्ने भनेर छुट्याउनै पर्दैन । यो दृश्य हेर्नुस्  ।

बार्बर अर्थात् कपाल काट्ने तालिममा पनि महिलाहरु छन् । सहभागीहरु तालिम निकै प्रभावकारी भएको बताउँछन् । 

थांका, हाम्रो परम्परागत चित्रकलाको पेशा र सीप हो । नेपाली थांका विश्व बजारमा निकै लोकप्रिय छ । 

यसको कलात्मकताले विदेशी पर्यटक लोभ्याउँछ । महानगरले थांका बनाउने सीप पनि सिकाइरहेको छ । 

कहिल्यै पेन्सिल, कलर र ब्रससमेत नसमाएकाहरु पनि रुचि देखाइरहेका छन् । थांकाको काम छोटो समयमै धेरै सिक्न सकिएको  एक सहभागीले बताए । 

सीपमेलामा नयाँ प्रविधिमा आधारितदेखि परम्परागत जीवन उपयोगी सीप समेत सिकाइँदैछ । 

हिजोआज डाउन सिन्ड्रोमले धेरै बालबच्चा प्रभावित छन् । सीपमेलामा यस्ता बालबालिकाको स्याहारसुसार र रेखदेख कसरी गर्ने भन्ने प्रशिक्षण चलिरहेको छ । डाउन सिन्ड्रोम भएका बच्चाहरुको अभिभावकहरु यो तालिममा सहभागी छन् ।

त्यसैगरी यहाँ एआई प्रविधिको प्रयोग पनि सिकाइँदैछ । सीसिटिभी, ल्यापटप, जस्ता उपकरण मर्मत र ड्रोन सम्बन्धी पनि तालिम चलिरहेकोछ । 

विग, प्लम्बिङ, फ्लावर डेकोरेसन, वारिष्टा, सेरामिक्स, स्टक मार्केट, डिजिटल मार्केटिङ, मल्टिमिडियालगायतका विषयमा समेत सीपहरु सिकाइँदैछ ।