अहमदावाद विमान दुर्घटनामा २०४ जनाको मृत्यु पुष्टि, एक जनाको जीवितै उद्दार

भारतको अहमदावादमा भएको विमान दुर्घटनामा २०४ जनाको मृत्यु पुष्टि भएको छ । 

अहदावादको सरदार बल्लभभाइ पटेल अन्तर्राष्ट्रिय विमानस्थलबाट लण्डनतर्फ उडेको विमान उडेको केहीबेरमा नै दुर्घटनामा परेको हो । 

दुर्घटनामा एक जनाको जीवितै उद्दार भएको छ । विमानको सिट नम्बर ११ ए मा रहेका ४० वर्षका विश्वासकुमार रमेशको जीवितै उद्दार भएको भारतीय सञ्चार माध्यमहरुले जनाएका छन् । 

उनका अनुसार विमानले मैदान छाडेको ३० सेकेण्डपछि नै ठूलो आवाज आएको थियो, त्यसपछि विमान दुर्घटना भएको थियो । रमेशको आँखा, छाती र खुट्टामा चोट लागेको छ । उनी भारतीय मूलका बेलायती नागरिक हुन् र २० वर्षदेखि बेलायतमा बसोबास गरिरहेका छन् । 

रमेश आफन्तलाई भेट गर्न भारत आएका थिए ।  

एयर इन्डियाको बोइङ ७८७–८ ड्रिमलाइनर विमानमा २३२ यात्रु र १० जना चालक दलका सदस्यसहित लण्डनतर्फ उडेको थियो । 

यात्रुमध्ये १६९ जना भारतीय नागरिक थिए भने ५३ जना बेलायती नागरिक थिए । त्यस्तै १ जना क्यानडेली र ७ जना नेदरल्याण्डस्का नागरिक छन् । 

उनीहरुमध्ये २०४ जनाको मृत्यु पुष्टि भएको अहमदावादका पुलिस कमिस्नर जीएस मलिकले बताएका छन् । उनका अनुसार ४१ जनाको अस्पतालमा उपचार भइरहेको छ र उद्दार पनि चलिरहेको छ । 

विमान एयरपोर्टको ठीक बाहिरको बस्तीमा दुर्घटनामा परेको हो । विमान एक मेडिकल कलेजको छात्राबासको क्यान्टिनमाथि खसेको थियो । विमान खसेका बेला त्यहाँ छात्राहरु लन्च खाइरहेका थिए । 

घाइतेहरुको अहमदावादको सिभिल अस्पतालमा उपचार भइरहेको छ ।  

एयर इन्डिया भारतको टाटा ग्रुप अन्तर्गतको कम्पनी हो । 

प्रत्यक्षदर्शीका अनुसार भूकम्प गएको जस्तो ठूलो आवाज आएको थियो र विमानबाट धेरै धुवाँ उडिरहेको थियो । विमान के कारणले दुर्घटना भयो भन्ने अहिलेसम्म खुलेको छैन ।