प्रधानमन्त्रीको दाबी : एसईईमा यस वर्ष ६० प्रतिशत विद्यार्थी पास हुन्छन्

प्रधानमन्त्री केपी शर्मा ओलीले यस वर्षको माध्यमिक शिक्षा परीक्षा (एसईई) मा ६० प्रतिशत भन्दा बढी विद्यार्थी पास हुने दाबी गरेका छन् । 

शुक्रबार काठमाडौं विश्वविद्यालयको दीक्षान्त समारोहमा बोल्दै उनले गत वर्षको जस्तो नाजुक नतिजा यस वर्ष नहुने दाबी गरे । 

‘हामीले केही प्रभावकारी कदमहरु चालेका छौं जसले गर्दा ४८ प्रतिशत उतीर्णजस्तो नाजुक अवस्था हुने छैन । यसवर्ष ६०–६५ प्रतिशत कमसेकम पुर्‍याउनेछौं । भरसक त्यो भन्दा माथि होला’, प्रधानमन्त्री ओलीले भने । 

उनले एसईईमा उतीर्णको दर अब हरेक वर्ष बढ्दै जाने पनि बताए । 

केही महिनाअघि ओलीले एसईईमा ४८ प्रतिशत मात्र उतीर्ण हुनुमा शिक्षकहरु जिम्मेवार रहेको टिप्पणी गरेका थिए । उनले यस्तो नतिजा दिने शिक्षकले सेवा सुविधा बढाउन माग गरेको भन्दै आलोचना पनि गरेका थिए ।