रास्वपा र राप्रपाको अवरोधका कारण प्रधानमन्त्रीसँग प्रश्नोत्तर स्थगित

राष्ट्रिय स्वतन्त्र पार्टी र राष्ट्रिय प्रजातन्त्र पार्टीको अवरोधका कारण संसदमा प्रधानमन्त्रीसँग प्रत्यक्ष प्रश्नोत्तर स्थगित भएको छ । 

संसद बैठकको सुरुमै रास्वपा र राप्रपा सांसदहरु उठेर अवरोध गरेपछि सभामुख देवराज घिमिरेले प्रधानमन्त्रीसँगको प्रश्नोत्तर कार्यक्रम स्थगित गरेका हुन् । उनले प्रधानमन्त्रीसँगको प्रश्नोत्तर विशेष कारणवश स्थगित गरेको बताएका छन् । 

संसदमा हरेक महिनाको पहिलो हप्ता प्रधानमन्त्रीले सांसदहरुको प्रश्नको जवाफ दिने गर्छन् । तर रास्वपाले होहल्ला गर्ने भएपछि सभामुखले उक्त कार्यक्रम स्थगित गरेका हुन् । 

प्रधानमन्त्रीसँगको प्रश्नोत्तर कार्यक्रम स्थगित गरे पनि सभामुखले बजेटमाथिको छलफल भने अगाडि बढाएका छन् । रास्वपा र राप्रपा सांसद भने बैठक हल छाडेर बाहिरिएका छन् ।